Türkmen türgeni DÇ-2023-ň saýlama ýaryşynda ýüzmek boýunça altyn medal gazandy
Türkmen türgeni Anastasiýa Morgenştern 18-nji aprelden 22-nji aprel aralygynda Daşkentde geçýän dünýä çempionatyna saýlama ýaryşyň dördünji güni altyn medala mynasyp boldy.
ORIENT-e Türkmenistanyň Sportuň suw görnüşleri federasiýasynda habar bermeklerine görä, Morgenştern 50 metr aralygy erkin ýüzmekde 28.38 sekuntda geçip, altyn medala eýe boldy.
Bu baýrak Morgenşterniň şahsy hasabynda ikinji baýrakdyr. Ozal ol batterflýaý görnüşinde ýüzmekde 50 metr aralygy 30.72 sekuntda geçip, kümüş medala eýe bolupdy.
Ýaryşlaryň dört gününiň jemleri boýunça türkmen ýüzüjileriniň gorunda sekiz medal— dört altyn, üç kümüş we bir bürünç medal boldy.
Ýatladýarys, türkmen wekiliýetiniň düzümini bu ýaryşda 15 adam, şol sanda 12 ýüzüji düzdi. Erkekleriň toparyna: Merdan Ataýew, Musa Jalaýew, Dawid Akopýan, Arslan Gaýypnazarow, Eminguly Ballykow, Abdyrahman Agamyradow, Selim Nazarow girdiler.
Zenanlar toparyna: Aýnur Primowa, Waleriýa Mirenskaýa, Eneş Primowa, Anastasiýa Morgenştern we Ejeş Primowa wekilçilik edýärler.
Türkmen ýüzüjileri Wladimir Nowikowyň we Mark Pilýuginiň ýolbaşçylygynda çykyş edýärler.
Daşkentdäki ýaryş Türkmenistandan, Özbegistandan we Täjigistandan 265 ýüzüjini (196 erkek we 69 zenan) ýygnady.
ORIENT habarlar
