BAE startaplar üçin bütindünýä bäsleşigine badalga berer
BMG-niň 2023-nji ýylyň 30-njy noýabryndan 12-nji dekabryna çenli geçjek howanyň üýtgemegi boýunça Maslahatynyň (COP 28) öňüsyrasynda BAE-niň Senagat we öňdebaryjy tehnologiýalar ministrligi durnukly ösüşe we dekarbonizasiýa gönükdirilen tehnologik kärhanalar üçin startaplaryň bütindünýä bäsleşigini (Make it in the Emirates Forum) geçirer.
31-nji maýdan 1-nji iýuna çenli geçiriljek bäsleşik bütin dünýädäki startaplara durnukly ösüş babatynda innowasiýalary (täzeçillikleri) we tehnologiýalary görkezmek üçin meýdança bermäge, bu babatda tejribe alyşmaga mümkinçilik bermäge niýetlenendir. Startaplar şeýle hem geljekdäki ýaşyl pudaklaryň esasyny goýmak üçin mundan beýläk ösmäge we BAE-de öz tehnologiýalaryny ýaýbaňlandyrmaga mümkinçilik alarlar.
«Biz startaplaryň bir giden pudaklary üýtgedip biljek eýýamynda ýaşaýarys. Bu startaplaryň dünýäniň wajyp meseleleri üçin, şol sanda howanyň üýtgemegi üçin köp zady wada edýän çözgütleri bar» - diýip, BAE-niň Senagat we öňdebaryjy tehnologiýalar ministrliginiň öňdebaryjy tehnologiýalary ornaşdyrmak we ösdürmek boýunça direktory Tarik Al Haşimi aýtdy.
Bäsleşige gatnaşmak üçin ýüz tutmalary tabşyrmagyň soňky möhleti – 5-nji maý.
Eminler hödürlenen innowasion işläp düzmeleriň, öňe gidiş mümkinçiliginiň, gerimliginiň we taslamanyň durnuklylygynyň we bäsleşige artykmaçlyklarynyň esasynda 24 startapy seçip alar.
Bäsleşik Make it in the Emirates (Muny Emiratda amala aşyr) şygary astynda ýurda maýa goýumçylaryny, senagatçylary we önümçiligiň täzelikçilerini çekmek maksady bilen, BAE tarapyndan badalga berlen birnäçe başlangyçlaryň biridir.
ORIENT habarlar
