Eýran Türkmenistana barýan demir ýoluň geçirijilik kuwwatyny artdyrmak isleýär
Şenbe güni Eýranyň ulag ösüş gaznasynyň ýerine ýetiriji direktory Russiýanyň we Hindistanyň maliýe çeşmelerini ýurtda ulag infrastrukturasy taslamalaryny durmuşa geçirmekde ulanmak mümkinçiligini mälim etdi.
Ol: “Merkezi Aziýa döwletleriniň demir ýol ulaglary babatdaky güýçli pozisiýasyny göz öňünde tutsak, “Demirgazyk-Günorta” geçelgesinde demirýollaryň geçirijilik kuwwatyny ulanmak üçin has köp mümkinçilik bar” – diýip aýtdy we gündogar Eýranda bu ugurda infrastrukturany güýçlendirmek we ösdürmek üçin möhüm taslamalaryň bardygyna ünsi çekdi.
Şeýlelikde, onuň sözlerine görä, sebit ulag ulgamynyň zerurlyklarynyň aglaba köpüsini Inçeburun geçelgesiniň we Sarahsyň üsti bilen bilen Bender-Abbas portundan Türkmenistana çenli demir ýoluň geçirijilik kuwwatyny ýokarlandyrmak arkaly kanagatlandyrmak bolar – diýip, Tasnim news agentligi habar berýär.
Şeýle-de “Demirgazyk-Günorta” geçelgesiniň ähli mümkinçiliklerinden peýdalanmak üçin Eýran döwletine hazarýaka döwletleriň portlary bilen aragatnaşyklary işjeňleşdirmek arkaly Hazardaky ulag ulgamyny güýçlendirmek möhümdir – diýip, Daneş Jafari aýtdy.
Eýranyň ulag ösüş gaznasy ýakynda ulag taslamalaryny maliýeleşdirmegi giňeltmek maksady bilen döredildi.
ORIENT news
