Türkmen bilermenleri Moskwadaky Hazar energetika forumyna gatnaşdylar
20-nji aprelde Moskwada geçirilen XV Hazar energetika forumyna gatnaşyjylar energetika howpsuzlygy, sebitdäki nebitgaz toplumynyň ösüşi we ekologiýa meselelerini ara alnyp maslahatlaşdylar. Sebitiň bilermenleriniň duşuşygy Sergo Ordžonikidze adyndaky Russiýanyň Döwlet geologiýa gözleg uniwersitetinde ýüzbe-ýüz we onlaýn ýagdaýda geçirildi – diýip, TASS habar berýär.
Türkmenistanyň, Azerbaýjanyň, Eýranyň, Gazagystanyň we Russiýanyň wekilleri Hazar ýurtlarynyň sebitdäki energiýa howpsuzlygyny üpjün etmek, geologiki gözleg, nebit we gaz öndürmek, gaýtadan işlemek we daşamak boýunça özara gatnaşyklaryny ara alyp maslahatlaşdylar, şeýle hem ýaşyl energetikanyň geljegine we importuň ornuny tutýan enjamlary öndürmek meselesine garadylar.
Forumyň çäginde ylmy guramalaryň arasynda hyzmatdaşlyk hakynda dört şertnama gol çekildi. Duşuşyga gatnaşyjylar tarapyndan Moskwa forumynyň netijeleri boýunça kabul edilen teklipler bukjasy her ýyl Hazar döwletleriniň ýolbaşçylaryna iberilýär.
ORIENT news
