Gazagystan daşary syýasat konsepsiýasyny täzelemegi meýilleşdirýär
Gazagystanyň prezidenti Kasym-Žomart Tokaýew ýurduň daşary syýasat boýunça konsepsiýasyny täzelemegiň möhümdigi barada beýan etdi.
«Häzirki gün dünýäde çynlakaý üýtgeşmeler bolup geçdi. Şol sebäpli içerki howpsuzlyk meselesine, goranyş ukybyny güýçlendirmäge, halkara arenasynda Gazagystanyň we tutuş Merkezi Aziýa sebitiniň abraýyny ýokarlandyrmaga aýratyn üns bermek gerekdir» — diýip, ol ýurduň durmuş-ykdysady ösüş meseleleri boýunça ýygnakda çykyş etmek bilen nygtady.
Gazagystanyň baştutany hökümete Strategiýa-2050 maksatnamasyny täzelemegi tabşyrandygyny sözüniň üstüne goşdy. Bu resminama Gazagystanyň durmuş-ykdysady we jemgyýetçilik-syýasy ösüşiniň uzakmöhletleýin göz öňüne getirmesini we esasy ileri tutulýan ugurlaryny kesgitleýär.
Tokaýew şeýle hem milli howpsuzlygy üpjün etmekde täze çemeleşmeleriň zerurdygyny belledi.
ORIENT habarlar
