Türkmenistan GDA-nyň ykdysady meseleler boýunça Komissiýasynyň mejlisine wekilçilik etdi
Türkmenistanyň wekiliýeti GDA-nyň Ykdysady geňeşindäki ykdysady meseleler boýunça Komissiýanyň Moskwada geçirilen nobatdaky mejlisine gatnaşdy. Bu barada Arkalaşygyň metbugat gullugy habar berýär.
Taraplar GDA-nyň giňişligindäki ykdysady hyzmatdaşlyga degişli birnäçe meseleleri ara alyp maslahatlaşdylar. Şeýlelikde, geçen ýylyň dowamynda Arkalaşygyň ýurtlarynyň ösüşiniň esasy makroykdysady görkezijileri bilen tanyşdylar.
Bahalandyrmanyň netijeleri makroykdysady durnuklylygy saklamaga, ykdysady ösüşiň oňyn depginlerini gazanmaga, şeýle hem daşary söwda gatnaşyklaryny pugtalandyrmaga gönükdirilen çäreleri taýýarlamakda we ýerine ýetirmekde ulanylar.
Komissiýanyň agzalary şeýle hem GDA agza döwletleriniň standartlaşdyrmak, metrologiýa, hili dolandyrmak we sertifikatlaşdyrmak babatynda hünärmenleri taýýarlamak, gaýtadan taýýarlamak we hünärini ýokarlandyrmak boýunça düýp guramanyň Düzgünnamasynyň taslamasyny makulladylar. Bu derejäni «Standartlaşdyrmak, metrologiýa we sertifikatlaşdyrmak Akademiýasy» atly goşmaça hünär biliminiň Federal döwlet bilim edarasy aldy.
Komissiýanyň indiki mejlisini 2023-nji ýylyň 17-nji maýynda geçirmek meýilleşdirildi.
ORIENT habarlar
