Türkmenistanyň wekiliýeti SPECA ýurtlarynyň Ženewadaky ministrler mejlisine gatnaşdy
Türkmenistanyň wekiliýeti, wise-premýer, Daşary işler ministri Raşid Meredowyň ýolbaşçylygynda BMG-nyň Merkezi Aziýanyň ykdysadyýetleri boýunça ýörite maksatnamasynyň (SPECA) duşenbe güni Şweýsariýanyň Ženewa şäherinde geçirilen ministrler mejlisine gatnaşdy.
Bu forumda Türkmenistan SPECA-ny has-da gowulandyrmak üçin birnäçe başlangyçlary öňe sürdi. Şol bir wagtyň özünde, Türkmenistanyň 2019-njy ýylda SPECA sekretarýatyny döretmek arkaly Maksatnamany institusional güýçlendirmek baradaky öňe süren teklibiniň ähmiýeti nygtaldy diýip, Türkmen Daşary işler ministrliginiň metbugat gullugy habar berýär.
Şeýle hem, türkmen tarapy SPECA-nyň taslamasyny we maksatnama çärelerini durmuşa geçirmek üçin zerur bolan täze maliýe çeşmelerini döretmäge çagyrdy. Bu nukdaýnazardan, Türkmenistanyň SPECA köp hyzmatdaş ulag gaznasyny döretmek baradaky teklibi goldanyldy.
Mundan başga-da, türkmen wekiliýeti BMG Baş Assambleýasynyň BMG-nyň Merkezi Aziýanyň ykdysadyýetleri üçin ýörite maksatnamasynyň 25 ýyllygyna bagyşlanan karary taýýarlanmagy hakynda pikirini beýan etdi.
ORIENT news
