Kanwondodaky ýetginjekler Olimpiadasy-2024-i gurnaýjylar meýletinçileri gözleýärler
Kanwondoda (Koreýa Respublikasy) 2024-nji ýylyň Gyşky ýetginjekler Olimpiýa oýunlarynyň guramaçylyk komiteti ýaryşlara meýletinçileri ýygnaýandyklary baradaky maksatnama badalga berdiler.
2018-nji ýylda Phýonçhanede geçirilen Gyşky Olimpiýa oýunlarynyň mirasyny we meýletinçilik ruhuny dowam etmek bilen, gurnaýjylar üç sany dürli derejede iki müň meýletinçini çekmegi: iňlis dilini erkin bilýän hünärmenler; 19 ýaşa çenli we ondan uly şahslar; 15 ýaşdan 18 ýaşa çenli bolan ýaşlary işe çekmegi meýilleşdirýärler.
Meýletinçileri ýygnamak 2023-nji ýylyň 31-nji maýyna çenli şu salgylanma boýunça açykdyr.
Saýlanyp alnan meýletinçiler ýaryşlaryň dört zolagyndan birinde işlemäge ajaýyp mümkinçilik alarlar. Olaryň işi türgenlere goldaw bermegi, KHBS-ni dolandyrmagy, sport dolandyryşy, çäreleriň geçirilýän ýerinde kömek bermegi öz içine alar. Işiň dowamynda meýletinçiler egin-eşik, iýmit we ulag, ýaryşlary kabul edýän şäheriň daşynda ýaşaýanlar bolsa ýaşaýyş ýeri bilen üpjün ediler.
Seçip almagyň birinji tapgyry 2023-nji ýylyň iýun aýyndan iýul aýyna çenli geçer. Söhbetdeşligi göz öňünde tutýan ikinji tapgyr 2023-nji ýylyň awgustyndan oktýabr aralygynda geçer. Şol döwürde hem meýletinçiler üçin esasy okuw geçiriler. Seçip almagyň gutarnykly netijeleri oktýabr aýynda belli bolar.
2024-nji ýylyň Gyşky Ýetginjekler Olimpiýa oýunlary Kanwondoda (Günorta Koreýa) 19-njy ýanwardan 1-nji fewrala çenli geçer. Ýaryşlaryň 81 milli olimpiýa komitetlerinden 1900 türgeniň ýygnalmagyna garaşylýar.
ORIENT habarlar
