Aşgabatda 16-njy “Merkezi Aziýa — Koreýa Respublikasy” hyzmatdaşlyk forumy geçiriler
Koreý-türkmen parlamentara dostluk toparynyň ýolbaşçysy Li Dal Gonuň ýolbaşçylygynda Koreýa Respublikasynyň parlament wekiliýeti Aşgabatda iş duşuşyklarynyň birnäçesini geçirdi.
Hususan-da, koreýaly myhmanlar Mejlisiň Başlygy Dünýägözel Gulmanowa bilen geçirilen duşuşykda iki ýurduň kanunçykaryjy guramalarynyň arasyndaky gatnaşyklary giňeltmegiň ýollaryna garadylar.
Hyzmatdaşlygyň köptaraply gün tertibi Koreýanyň parlamentarileriniň Türkmenistanyň Daşary işler ministrliginde geçirilen duşuşygynda hem ara alnyp maslahatlaşyldy.
Türkmenistanyň Halk Maslahatynyň Başlygy Gurbanguly Berdimuhamedowyň 2022-nji ýylyň noýabr aýynda Koreýa Respublikasyna amala aşyran saparynyň türkmen-koreý gatnaşyklaryna täze itergi bolup hyzmat edendigi bellendi.
Duşuşyklarda Hökümetara türkmen-koreý toparynyň söwda, ykdysady, ylmy we tehnologiki hyzmatdaşlyk boýynça möhüm ornuna üns berildi. Ylym, bilim, lukmançylyk, sport, syýahatçylyk, medeni-gumanitar pudaklarda özara gatnaşyklaryň ähmiýeti nygtaldy. Şeýle hem, türkmen tarapy şu ýyl Aşgabatda geçiriljek 16-njy “Merkezi Aziýa – Koreýa Respublikasy” hyzmatdaşlyk forumyna taýýarlygyň gidişi barada habar berdi.
Saparyň dowamynda Koreýanyň wekiliýeti nebitgaz pudagynyň ýolbaşçylary bilen hem gepleşikleri geçirdi.
Mundan başga-da, myhmanlar Kopetdagyň etegindäki atçylyk-sport toplumyna baryp gördüler, ajaýyp ahalteke bedewlerine syn etdiler, türkmen çapyksuwarlarynyň sirk çykyşlaryna tomaşa etdiler, täze Arkadag şäherindäki binagärlik panoramasy bilen tanyş boldular.
ORIENT news
