Gazagystanyň hökümeti oba ýerlerinde işsizligiň derejesiniň kemelmegine garaşýar
Gazagystan Respublikasynyň hökümeti 2023-2027-nji ýyllar üçin oba çäkleriniň ösüş Konsepsiýasyny kabul etdi, ol obalylaryň arasynda işsizligiň derejesiniň 4,2% kemelmegini göz öňünde tutýar. Häzirki wagtda tutuş ýurt boýunça, muňa şäher ilatyny hem goşmak bilen, bu görkeziji 4,9% deňdir.
Taslama laýyklykda oba ilatyny ýerli dolandyryş ulgamyna işjeň çekerler, çäkleriň özünde bolsa — syýahatçylygy, ekohowpsuzlygy, döwlet goldawy maksatnamalarynyň kömegi bilen eksporta gönükdirilen önümçiligi ösdürerler – diýip, zakon.kz habar berýär.
Mundan başga-da, mekdepleri, hassahanalary we medeni desgalary köpçülikleýin gurmak meýilleşdirilýär. 2027-nji ýyla çenli oba ilatly nokatlarynyň ýaşaýjylary gerekli ulag we sport infrastrukturasy, ýokary tizlikli internet bilen doly üpjün ediler.
Iş berijileri hem höweslendirerler: öz işgärleri üçin ýaşaýyş jaýyny gurýanlara çykdajylaryň ýarysy gaýtarylyp berler. Serhetýaka etraplarynda aýlyklara goşmaça kömek pullary berler we ýylyna 2,5% bilen şahsy mellek ýerlerine mikrokarzlaryň berilmegi giriziler.
Hökümet şeýle hem girdejisi iň az aýlyk hakyndan pes bolan ilatyň böleginiň 5,8% çenli kemelmegine garaşýar.
ORIENT habarlar
