Pakistanyň COMSATS uniwersiteti Türkmenistandan has köp talyp okatmaga gyzyklanma bildirýär
Türkmenistanyň Pakistandaky ilçisi Atajan Möwlamow Pakistanyň Tehnologik uniwersitetiniň (COMSATS) rektory, professor Muhammed Afzal bilen bilim babatynda hyzmatdaşlygy ara alyp maslahatlaşdy – diýip, Daily Times habar berýär.
Türkmenistanyň diplomatiki wekilhanasynyň üçünji sekretary Hemra Annamuhammedowyň hem gatnaşan gepleşikleriniň barşynda Pakistanyň ýokary okuw mekdebiniň wekilleri Türkmenistandan bolan talyplary bilim maksatnamalaryna çekmek üçin giň mümkinçilikleriň bardygyny belläp geçdiler.
Professor Afzal häzirki wagtda ýokary okuw mekdebinde Pakistandan 33 100 talybyň we dünýäniň 23 ýurdundan 360 talybyň bakalawriatyň, magistraturanyň we doktoranturanyň 100-den gowrak maksatnamasy boýunça okaýandygyny nygtady.
Türkmen diplomatlary ylym we bilim ulgamy boýunça ikitaraplaýyn hyzmatdaşlygy ýola goýmaga gyzyklanma bildirdiler we talyplary alyşmagy we bilelikdäki maslahatlary guramaklyga çagyrdylar.
Ilçi Möwlamow ýakyn wagtda Türkmenistanda ylym we bilim boýunça Bilelikdäki türkmen-pakistan iş toparynyň 2-nji mejlisiniň geçjekdigini sözüniň üstüne goşdy. Bu mejlise gatnaşmaga Yslamabatdan bu ýokary okuw mekdebi hem çagyrylandyr.
ORIENT habarlar
