Astrahanyň gubernatory Türkmenistandaky prawoslawlara Aleksandr Newskiýniň ikonasyny gowşurdy
Türkmenistana saparynyň çäklerinde Astrahan oblastynyň gubernatory Igor Babuşkin Türkmenbaşyda ýerleşýän prawoslaw buthanasyna knýaz Aleksandr Newskiýniň ikonasyny gowşurdy – diýip, «Astrahan 24» habar berýär.
Hazarýaka ýurtlaryň çäginde ýaşaýan halklaryň arasyndaky dostlugy pugtalandyrmak üçin prawoslaw dininiň mukaddes ýerlerine baryp görmek – Babuşkiniň baştutanlyk eden «Hazar-dostluk deňzi» motosiklli ýörişiň maksatnamasynyň aýrylmaz bölegidir.
Motosiklli ýöriş 1-nji aprelde Astrahandan badalga aldy we 11-nji aprelde tamamlanmaly. 10 günüň dowamynda motosiklli ýörişe gatnaşyjylar 5 müň km ýol geçerler.
Türkmenistanda Igor Babuşkin Prezident Serdar Berdimuhamedow bilen duşuşdy. Taraplar meseleleriň giň görnüşini, şol sanda Türkmenbaşy bilen Astrahanyň arasynda kadaly howa gatnawyny açmaklygy ara alyp maslahatlaşdylar.
ORIENT habarlar
