Türkmenistan 2024-2026-njy ýyllar üçin ÝUNISEF-iň Ýerine ýetiriji geňeşiniň agzalygyna saýlandy
BMG-niň Ykdysady we Sosial Geňeşiniň (ECOSOC) guramaçylyk sessiýasynda Türkmenistany BMG-niň Çagalar gaznasynyň (ÝUNISEF) 2024-2026-njy ýyllar üçin Ýerine ýetiriji geňeşiniň agzalygyna biragyzdan saýladylar. Bu barada Türkmenistanyň BMG-nyň ýanyndaky Hemişelik wekilhanasynyň saýty habar berýär.
Ozal Türkmenistan 2018-2020-nji ýyllarda ÝUNISEF-iň Ýerine ýetirji geňeşiniň düzümine giripdi.
Hökümetara goldawyny we gözegçiligi amala aşyrýan BMG-nyň Çagalar gaznasynyň ýolbaşçy edarasynyň agzasy hökmünde Türkmenistan ÝUNISEF-iň işine syn etmäge we onuň syýasatynyň, ýurt boýunça maksatnamalarynyň we býujetiniň tassyklanmagyna gatnaşar. Bu Türkmenistan üçin dünýä derejesinde çagalaryň abadançylygyny üpjün etmäge goşant goşmak üçin mümkinçilikdir, çaganyň hukuklaryna görä gatnaşykda öz borçnamalaryny berjaý etmekde dünýä jemgyýetçiligine görelde bolmak üçin mümkinçilikdir.
Işi Býuro tarapyndan utgaşdyrylýan Ýerine ýetirji geňeşiň düzümine BMG-niň agza-döwletleriniň bäş sebitleýin toparyna wekilçilik edýän 36 agza girýär. Geňeş her ýylda bir gezek ýygnanýar.
Häzirki wagtda Türkmenistan BMG-niň 13 komissiýasynyň, komitetleriniň we geňeşleriniň agzasydyr. Ýurt şeýle hem BMG-niň Baş Assambleýasynyň wise-başlyklygyna ýedi gezek saýlandy.
ORIENT habarlar
