Türkmenistan we Ýaponiýa medeni-ynsanperwer ugry boýunça hyzmatdaşlygy ara alyp maslahatlaşdylar
Medeni-ynsanperwer ulgamynda ikitaraplaýyn hyzmatdaşlygy mundan beýläk-de giňeltmekligiň meseleleri Türkmenistanyň Ýaponiýadaky ilçisi Atageldi Baýramowyň Min-on Music ýapon birleşmesiniň prezidenti Kadzuto Ito bilen duşuşygynyň barşynda ara alnyp maslahatlaşyldy. Bu barada türkmen diplomatik wekilhanasynyň saýtynda habar berilýär.
Medeni-ynsanperwer ugruň türkmen-ýapon gatnaşyklarynyň aýrylmaz bölegidigini belläp, taraplar saz we sungat babatynda hyzmatdaşlygyň ýerliklidigini nygtadylar.
1963-nji ýylda esaslandyrylyp, Min-on Music konsert birleşmesi özara düşünişmekligi we dürli halklaryň arasynda hormat-sarpany ösdürmek maksady bilen, saz medeniýeti bilen bütindünýä alyşmagyna ýardam edýär.
Birleşme döredilen wagtyndan bäri ýüzden gowrak ýurtlardan müňlerçe sazandalar we artistler Ýaponiýada boldular, ýüzlerçe ýapon artistleri bolsa daşary ýurtlarda çykyş etdiler. Häzirki wagtda birleşme bütin dünýä boýunça ýylda 600 çykyşa hemaýatkärlik edýär.
ORIENT habarlar
