Astanada geçjek Aziýanyň çempionatyna Türkmenistanyň göreş boýunça ýygyndysynyň düzümi belli boldy
Türkmenistanyň erkin we grek-rim göreşi boýunça ýygyndysy 7-nji aprelden14-nji aprel aralygynda Astanada (Gazagystanda) geçjek Aziýanyň çempionaty-2023-e gatnaşar.
Öňde boljak yklym ýaryşynda türkmen ýygyndysynyň düzüminde 15 göreşiji çykyş eder.
Erkin göreşiň wekilleriniň hatarynda: Myrat Hojanepesow (61 kg çenli), Gurbanmuhammet Çaryýew (65 kg çenli), Perman Hommadow (70 kg çenli), Jumadurdy Mamyşow (74 kg çenli), Wepa Hemenekow (79 kg çenli), Döwletmyrat Orazgylyjow (86 kg çenli), Zyýamuhammet Saparow (125 kg çenli) dagy çykyş ederler.
Alty türgen grek-rim göreşi boýunça tutluşykda Türkmenistana wekilçilik eder: Begmyrat Nobatow (67 kg çenli), Toýly Orazow (72 kg çenli), Jeýhun Öwezdurdyýew (77 kg çenli), Şyhberdi Öwelekow (87 kg çenli), Amanberdi Agamämmedow (97 kg çenli), Aýbegşazada Kurraýew (130 kg çenli).
Laçyn Annamyradowa (50 kg çenli) we Ogulnar Egemberdiýewa (68 kg çenli) zenanlar göreşinde baýrakly orunlary eýelemek ugrunda bäsleşerler.
Türgenler 10 agram derejesinde medallar ugrunda tutluşarlar. Ýaryşda 20 ýurtdan grek-rim, erkin göreşiň we zenanlar göreşiniň wekilleri çykyş ederler.
ORIENT habarlar
