Russiýanyň gämi gurluşyk we abatlaýyş kärhanasynda Hazar deňzinde işlemek üçin gury ýük konteýner gämisi gurlar
Maý aýynda Russiýanyň Astrahan oblastyndaky gämi gurluşyk we abatlaýyş kärhanasynda Hazar deňzi üçin gury ýük konteýner gämileriniň esasy gämisiniň gurluşygyna başlanar. Gämi gurluşyk we abatlaýyş boýunça Günorta merkeziniň “Lotos” önümçilik meýdançasynda gämi gurluşygy üçin zerur bolan metal kesmek işine girişildi – diýip, Günorta merkeziň metbugat merkezine salgylanýan TASS habar berýär.
"Lotos" gämi abatlaýyş kärhanasy Astrahan aýratyn ykdysady zolagynyň esasy önümçilik desgasy bolup, dürli görnüşli gämileriň gämi gurluşygy bilen meşgullanýar. Günorta merkez bilen döwlet ulag lizing kompaniýasynyň arasynda baglaşylan şertnama laýyklykda, bu ýerde dört sany gury ýük gämisi gurlar. Gämiler suwa 2025-nji ýylda goýberiler.
Gäminiň taslamasy “Wympel” konstruktorlyk býurosy tarapyndan işlenip düzüldi we “derýa-deňiz” görnüşindäki ilkinji rus uniwersal gury ýük konteýner gämisidir. Ol halkara ölçeglerinde kesgitlenen sana laýyklykda, 531 konteýneri daşap biler.
Gury ýük gämileri sowadyjy konteýnerler üçin hem niýetlenendir, şeýle-de gämide gury ýüküň dürli görnüşleri – däne, agaç we agaç önümleri we ş.m. daşalar.
Raýat suw ulag gämilerini ýeňillikli şertlerde kärendesine almak maksatnamasynyň çäginde Russiýanyň Senagat we söwda ministrligi 2027-nji ýyla çenli Hazar deňzinde işlemek üçin 20-den gowrak konteýner gämisini gurmagy meýilleşdirýär - diýip, Günorta merkeziň metbugat merkezi habar berýär.
ORIENT news
