BMG-niň wezipeli şahslary Türkmenistanyň parahatçylygy we howpsuzlygy üpjün etmekdäki tagallalaryna ýokary baha berdiler
Nýu-Ýorka saparynyň çäklerinde Türkmenistanyň Daşary işler ministriniň orunbasary Mähri Bäşimowa BMG-niň ýokary wezipeli şahslary bilen duşuşyklary geçirdi – diýip, Türkmenistanyň BMG-niň ýanyndaky hemişelik wekilhanasynyň saýty habar berýär.
Hususan-da, Baş sekretaryň Ýewropa, Merkezi Aziýa we Amerika boýunça kömekçisi, Baş sekretaryň Merkezi Aziýa boýunça Ýörite wekiliniň wezipeleriniýerine ýetirýän Miroslaw Ýençe, şeýle hem Baş sekretaryň kömekçisi, Terrorçylyga garşy ýerine ýetirji müdiriýetiň ýerine ýetiriji direktory Natalýa German bilen gepleşikler boldy.
German Türkmenistanyň parahatçylyga we howpsuzlyga ygrarlydygyna, şeýle hem BMG-niň terrorçylyga garşy göreşmek bölümçeleri bilen ýurduň işjeň özara hyzmatdaşlygynyň pugtalandyrylmagyna goşýan goşandyna ýokary baha berdi. Öz gezeginde, Mähri Bäşimowa Türkmenistanyň mundan beýläk hem wajyp transmilli meselleleri çözmekde BMG bilen ýakyn hyzmatdaşlygy dowam etdirmäge taýýardygyny bildirdi.
Sebitdäki durnuklylygy öňe sürmekdäki Türkmenistanyň tagallalary we liderligi Miroslaw Ýençe bilen bolan duşuşykda hem bellenip geçildi. Hususan-da, BMG-niň ýokary wezipeli wekili ýurt tarapyndan BMG-niň Baş Assambleýasynyň Merkezi Aziýada parahatçylyk, ynanyşmak we hyzmatdaşlyk boýunça ýokary derejedäki ara alyp maslahatlaşmalaryny, şeýle hem Merkezi Aziýanyň Ýaşlar dialogyny gurandygyny nygtady.
Taraplar şeýle hem Merkezi Aziýada parahatçylygy we howpsuzlygy, şeýle hem sebitde öňüni alyş diplomatiýasynyň mehanizmlerini pugtalandyrmak işinde Türkmenistan bilen MAÖDSM-iň arasynda hyzmatdaşlygyň ösdürilmegini ara alyp maslahatlaşdylar.
ORIENT habarlar
