Prezident Serdar Berdimuhamedow Ysraýylyň ilçisinden ynanç hatyny kabul etdi
Prezident Serdar Berdimuhamedow Ysraýyl Döwletiniň Türkmenistanda wezipä täze bellenen Adatdan daşary we Doly ygtyýarly ilçisi Ismail Haldini kabul etdi, ilçi döwlet Baştutanymyza ynanç hatyny gowşurdy. Sişenbe güni geçirilen duşuşygyň barşynda diplomat Ysraýyl Döwletiniň Prezidenti Ishak Gersogyň we Premýer-ministr Benýamin Netanýahunyň mähirli salamyny ýetirdi.
Duşuşygyň dowamynda döwletara dialogy giňeltmegiň mümkinçilikleri, ilkinji nobatda söwda-ykdysady ugurlar boýunça hyzmatdaşlygy ösdürmek meseleleri ara alnyp maslahatlaşyldy. Şunuň bilen baglylykda, hormatly Prezidentimiz Serdar Berdimuhamedow döwlet we hususy ulgamyň wekilleriniň gatnaşmagynda maslahatlaşmalarydyr duşuşyklary geçirmegiň wajypdygyny belledi.
Ikitaraplaýyn gatnaşyklaryň möhüm ugurlarynyň hatarynda oba hojalyk ulgamy bellenip geçildi. Şunda Türkmenistanyň Ysraýylyň oba hojalygynda gazanan tejribeleri bilen ýakyndan tanyşmaga, suw serişdelerini tygşytly ulanmak we süýjetmek boýunça täze tehnologiýalar babatda hyzmatdaşlygy ýola goýmaga gyzyklanma bildirýändigi nygtaldy.
Taraplar medeni-ynsanperwer ulgamda gatnaşyklary pugtalandyrmak meselelerine üns berdiler. Şunuň bilen baglylykda, Medeniýet günlerini guramagyň, iki ýurduň wekilleriniň ylym-bilim forumlaryna we bäsleşiklere işjeň gatnaşmagyny üpjün etmegiň zerurdygy bellendi. Iki ýurduň baý taryhy-medeni mirasy bilen ýakyndan tanyşmak üçin syýahatçylyk mümkinçiliklerini ulanmagyň zerurdygy barada aýdyldy.
ORIENT news
