Prezident Serdar Berdimuhamedow «Rossiýskiýe železnyýe dorogi» Baş direktoryny kabul etdi
Türkmenistan, biziň daşary ykdysady syýasatymyzyň esasy ugry bolup çykyş edýän halkara ulag hyzmatdaşlygynyň ösdürilmegine uly ähmiýet berýär, - diýip Prezident Serdar Berdimuhamedow duşenbe güni «Rossiýskiýe železnyýe dorogi» APJ geňeşiniň başlygy Oleg Belozýorow bilen geçirilen duşuşygynda aýtdy.
Döwlet Baştutanymyz ýurdumyzda logistik geçelgeleriniň netijeli peýdalanylmagy üçin amatly şertleriň döredilendigini belläp, Aşgabat şäherine sapar bilen gelen RŽD wekiliýetine, türkmen hyzmatdaşlary bilen netijeli gepleşikler geçirmegini arzuw etdi hem-de duşuşyklaryň netijeleriniň ulag pudagynda ikitaraplaýyn hyzmatdaşlygy giňeltmekde möhüm ädim boljakdygyna ynam bildirdi.
Bu ýerde Russiýanyň kompaniýalarynyň Türkmenistanda demir ýollary hem-de ugurdaş düzümleri döwrebaplaşdyrmak we elektrikleşdirmek, önümçilik amallaryny sanlylaşdyrmak, hünärmenleri taýýarlamak ulgamynda hyzmatdaşlygy ýola goýmak boýunça taslamalara gatnaşmagynyň geljegi uly görünýär.
Serdar Berdimuhamedowyň belleýşi ýaly, ýokary döwlet derejesinde ýola goýlan açyk, oňyn gatnaşyklar däp bolan türkmen-rus hyzmatdaşlygyny mundan beýläk-de ilerletmegiň möhüm şerti bolup durýar.
RŽD-nyň Baş direktory hem öz gezeginde Russiýanyň ulag kompaniýasynyň Türkmenistan bilen netijeli hyzmatdaşlygy mundan beýläk-de ösdürmäge uly gyzyklanma bildirýändigini belledi.
ORIENT news
