Türkmen modelýerleri Ýewraziýanyň ýokary moda bäsleşigine çagyrylýar
25-26-njy noýabrda Moskwada, Ýewraziýa Halk Assambleýasynyň goldawy bilen «Etno-Erato - 2023» milli eşikleriň XXII Ýewraziýa ýokary moda bäsleşigini geçirer.
Bu taslamanyň esasy maksady – ýaş modelýerleri, dizaýnerleri çekmek hem-de etnik we medeni dürlüligi, milli özboluşlylygy, şeýle hem taryhy mirasy goramak; arkalaşygy we Ýewraziýa halklarynyň parahatçylykly ösüşini güýçlendirmek bolup durýar.
Bäsleşik birnäçe kategoriýada geçiriler: iň gowy slawýan eşigi; Kawkaz halklarynyň iň gowy eşigi; iň gowy gündogar eşigi; fin-ugor halklarynyň iň gowy eşigi; Demirgazyk, Sibir we Uzak Gündogar halklarynyň iň gowy eşigi; häzirki zaman eşikdäki etnik nagyşlar; Afrika halklarynyň iň gowy eşigi (täze dalaşgär); etnik eşigiň retrosy; hereketdäki iň oňat etnik sahna eşigi (horeografiýa, çykyşdan bölekler, wokal bilen bilelikde we ş.m.).
Geçen ýyl Ýakutskda «Etno-Erato» etnik moda festiwaly geçirildi. Oňa 200-den gowrak moda dizaýneri, şol sanda Türkmenistandan, Gruziýadan, Mongoliýadan, Gazagystandan we Russiýanyň sebitlerinden gatnaşdylar.
Şonda eşikleri türkmen däp-dessurlarynda görkezen Körpegül Hudaýerdiýewa «Iň gowy gündogar eşigi» kategoriýada ikinji orny eýeledi.
Bäsleşige gatnaşmak isleýänler, 2023-nji ýylyň 1-nji noýabryndan öň ýüztutmany, portfoliony, suratlary we habarlaşmak üçin maglumatlaryny etno-erato.mdn@mail.ru e-poçta ugradyp bilerler.
ORIENT news
