Türkmenistan yslam ýurtlarynda parahatçylygy we ösüşi pugtalandyrmagy ara alyp maslahatlaşdy
Türkmen wekiliýeti Türkmenistanyň Daşary işler ministriniň orunbasary Wepa Hajyýewiň baştutanlygynda Yslam hyzmatdaşlyk guramasynyň agza-döwletleriniň parahatçylygy, howpsuzlygy we durnukly ösüşi pugtalandyrmagyň meselelerini ara alyp maslahatlaşdy – diýip, ýurduň daşary syýasat edarasy habar berýär.
Bu meseleler Afrika döwleti bolan Mawritaniýada geçirilen YHG-nyň ýurtlarynyň daşary işler ministrleriniň Geňeşiniň 49-njy mejlisiniň çäklerinde ara alnyp maslahatlaşyldy. Duşuşygyň barşynda syýasy, ykdysady we medeni-ynsanperwer häsiýetdäki meselelere hem deglip geçildi.
Türkmenistanyň DIM-niň baştutanynyň orunbasarynyň guramanyň baş sekretary Husseýn Brahim Taha bilen gepleşiklerinde Türkmenistan bilen yslam guramasy bilen ýola goýlan gatnaşyklara ýokary baha berildi. Soňra taraplar mundan beýläkki hyzmatdaşlyk barada pikir alyşdylar.
Şeýle hem türkmen diplomatlary gatnaşyjylary ekologiki kadalar berk göz öňünde tutulyp, gurulýan «akylly şäher» bolan Arkadag bilen tanyşdyrdylar.
ORIENT habarlar
