Türkmen hünärmenleri resminamalaryň howpsuzlygy boýunça sebitleýin seminara gatnaşdylar
Türkmenistan Merkezi Aziýada serhetleriň dolandyrylyşyna ýardam etmek Maksatnamasynyň (BOMKA 10) resminamalaryň howpsuzlygy meselesi boýunça sebitleýin seminaryna wekilçilik etdi. Bu barada Türkmenistanyň Döwlet gümrük gullugynyň saýty habar berýär.
Onlaýn-çärä şeýle hem Gazagystanyň, Gyrgyzystanyň, Täjigistanyň we Özbegistanyň serhet, migrasiýa we hukuk goraýjy edaralarynyň mugallymlar düzümi hem gatnaşdy.
Gatnaşyjylar resminamalary goramak, gorag serişdeleriniň, materiallaryň we tehnologiýalaryň dürli utgaşmalaryny ulanmak babatynda okatmagyň häzirki zaman görnüşleri we usullary bilen tanyş boldular. Resminamany goramak – bu ilki bilen serişdeleriň toplumydyr, olaryň biriniň ýa-da birnäçesiniň ýekelikde bolmagy resminamanyň hakykylygy baradaky meseläni doly çözüp bilmeýändigi seminarda bellenildi.
Çäre BOMKA 10 Maksatnamasynyň «Serhet edaralarynyň institusonal ösüşi» atly 1 Düzüm böleginiň çäklerinde gurnaldy. Ol Merkezi Aziýa ýurtlaryndaky serhet gözegçiligi edaralarynyň institusional mümkinçiligini mundan beýläk-de ösdürmäge we pugtalandyrmaga gönükdirilendir.
ORIENT habarlar
