Türkmenistan we Keniýa diplomatik gatnaşyklary ýola goýdular
Türkmenistan we Keniýa Respublikasy diplomatik gatnaşyklary ýola goýdular – diýip, Türkmenistanyň BMG-niň ýanyndaky Hemişelik wekilhanasynyň metbugat gullugy habar berýär.
Diplomatik gatnaşyklaryň ýola goýlandygy baradaky bilelikdäki beýannamasyna 14-nji martda Nýu-Ýorkda Türkmenistanyň BMG-niň ýanyndaky hemişelik wekili Aksoltan Ataýewa we Keniýa Respublikasynyň BMG-niň ýanyndaky hemişelik wekili Martin Kimani gol çekdiler.
Gol çekişlik dabarasynyň öňüsyrasyndaky gepleşikleriň barşynda taraplar iki ýurduň arasyndaky dostluk gatnaşyklaryny pugtalandyrmaga we ikitaraplaýyn syýasy, ykdysady we medeni dialogy kämilleşdirmäge ygrarlydygyny beýan etdiler.
Halkara guramalarynda hyzmatdaşlyk etmegiň möhümdigini belläp, hemişelik wekiller hem Türkmenistan üçin, şeýle hem Keniýa üçin bähbitli bolan BMG-niň gün tertibiniň meselelerini ara alyp maslahatlaşdylar.
ORIENT habarlar
