Dagystan Hazarýaka döwletleriň ilkinji sanly forumyny kabul eder
Oktýabr aýynda Dagystanda Hazarýaka döwletleriniň birinji sanly forumy geçiriler – diýip, Russiýanyň bu sebitiniň Sanly ösüş ministri Ýuriý Gamzatowa salgylanyp, TASS habar berýär.
Dagystanyň baştutanyň wezipesini wagtlaýyn ýerine ýetiriji Sergeý Melikowyň Russiýanyň Sanly ösüş, aragatnaşyk we köpçülikleýin kommunikasiýalar ministri Maksut Şadaýew bilen duşuşygynyň netijesinde bu barada degişli ylalaşyk gazanyldy.
Çäre «Hazar bäşligine» sebitde maglumat howpsuzlygyny üpjün etmegiň möhüm meselelerini ara alyp maslahatlaşmak üçin meýdançany üpjün eder. Ministriň habar bermegine görä, forumyň çäklerinde «Demirgazyk-Günorta» ulag geçelgesiniň geljegine garamak hem meýilleşdirilýär.
«Biziň wezipämiz - ähli goňşylarymyzy – Hazar boýunça hyzmatdaşlarymyzy - bir meýdançada birleşdirmekdir» - diýip, Gamzatow nygtady.
ORIENT habarlar
