Ysraýylyň Daşary işler ministri Eli Koeniň Aşgabada sapar bilen gelmegine garaşylýar
Ysraýylyň Daşary işler ministri Eli Koeniň Aşgabatda Ysraýylyň hemişelik ilçihanasynyň resmi açylyşyna gatnaşmak üçin ýakyn wagtda Türkmenistana gelmegine garaşylýar. Bu barada anna güni Ysraýylyň i24NEWS Halkara habarlar teleýaýlymy habar berdi.
Aşgabatda Ysraýylyň wagtlaýyn ilçihanasy takmynan, on ýyl mundan ozal açylypdy. Ýurduň wekilliginiň binasy geljekki hemişelik ilçihana üçin ýörite guruldy - diýip, teleýaýlym belläp geçýär.
Birnäçe ýyl bäri Türkmenistanyň we Ysraýylyň ýokary wezipeli wekilleri birek-biregiň ýurtlaryna baryp, syýasat, ykdysadyýet we energetika hyzmatdaşlygy boýunça resminamalara gol çekişdiler. Soňky döwürde iki ýurduň arasynda saglyk we kiberhowpsuzlyk ulgamlarynda hyzmatdaşlyk boýunça öňegidişlikler gazanyldy.
Daşary işler ministri Eli Koen “Israel Hayom” (Ysraýyl şu gün) neşiri bilen guralan söhbetdeşlikde Ysraýyl bilen Türkmenistanyň arasyndaky gatnaşyklaryň tutuş sebit bilen hyzmatdaşlygy pugtalandyrmakda möhüm strategiki ähmiýete eýedigini belläp geçdi.
Diplomat: "Ýurtlaryň arasynda, şol sanda saglygy goraýyş we kiber goranyş ulgamlarynda ykdysady hyzmatdaşlygy ösdürmegi dowam etdireris" - diýdi. Koen: "Ilçihananyň binasynyň açylyş dabarasy Ysraýyl bilen Türkmenistanyň arasyndaky gatnaşyklaryň pugtalandyrylmagynyň nobatdaky subutnamasy bolar we ýurtlaryň arasynda diplomatik gatnaşyklaryň ýola goýulmagynyň 30 ýyllygy mynasybetli dabaralar bilen utgaşar" – diýip belledi.
Şu hepde Ysraýylyň Daşary işler ministrliginiň Ýewraziýa we Günbatar Balkan bölüminiň başlygy Aşgabada sapar bilen geldi. Ol Türkmenistanyň daşary işler ministriniň, ýurduň Içeri işler ministriniň orunbasarlary, Saglygy goraýyş ministri we beýleki resmi adamlar bilen duşuşyp, giňişleýin maslahatlar geçirdi. Gepleşikleriň dowamynda ikitaraplaýyn gatnaşyklary işjeňleşdirmäge degişli bolan meseleler ara alnyp maslahatlaşyldy.
ORIENT news
