Türkmenistan raýat jemgyýetiniň ÝB-Merkezi Aziýa forumynda wekilçilik etdi
Türkmenistanyň wekiliýeti Daşkentde geçýän raýat jemgyýetiniň «ÝB-Merkezi Aziýa» 4-nji forumyna gatnaşýar, onda ýaşlaryň karar kabul etmäge gatnaşmagy, gender deňliginiň we daşky gurşawy goramagyň meseleleri ara alnyp maslahatlaşylýar.
Türkmenistandan bu çärä 11 jemgyýetçilik gurama wekilçilik edýär – diýip, Ýewropa Birleşiginiň Türkmenistandaky wekilhanasynyň Instagram hasabynda habar berilýär.
Raýat jemgyýetiniň forumy ÝB-niň Merkezi Aziýa boýunça strategiýasynyň kabul edilmeginden soň döredildi. Ol ýurduň durnukly ösüşi üçin raýat jemgyýetiniň esasy ornuny nygtamaga, möhüm kararlaryň kabul edilişinde olaryň sesini güýçlendirmäge niýetlenendir.
Çäre hökümetleriň agzalaryna, hususy pudagyň, raýat jemgyýetiniň wekillerine, şeýle hem ylmy toparlara we KHBS-ne ÝB-niň sebitleýin strategiýasyny ýerli derejede ýerine ýetirmekde raýat jemgyýetiniň nähili goşant goşup biljekdigi baradaky pikirleri we teklipleri ara alyp maslahatlaşmak üçin meýdança berýär.
Strategiýa birnäçe ugurlary bölüp berýär, olarda raýat jemgyýetiniň wekilleri we hökümetler ÝB-i bilen birlikde bilelikdäki çemeleşmäni işläp düzüp bilerler: internete we sanlylaşdyrma bolan elýeterliligiň gowulandyrylmagy; durmuşy telekeçiligiň ösdürilmegi, durmuşy häsiýetli ykdysady meseleleri çözmek üçin işewür çemeleşmäniň ulanylmagy; durnukly we inklýuziw dolandyryşa goldaw bermek üçin raýat jemgyýetiniň döwlet kararlarynyň kabul edilişine gatnaşmagydyr.
ORIENT habarlar
