Türkmen işewürligi ÝTÖB-nyň okuwynda internetde satuwlary artdyrmagyň gurallaryny özleşdirýär
Ýewropanyň täzeleniş we ösüş banky Ýewropa Birleşiginiň maliýe taýdan goldaw bermeginde Türkmenistanda sanly marketingiň gurallarynyň kömegi arkaly internetde satuwa başlamaga we onuň gerimini artdyrmaga bagyşlanan sekiz günlük okuw gurady. Okuwyň açylyşy «Arçabil» myhmanhanasynda bolup geçdi.
Okuw kursy hem nazaryýet, hem amaly sapaklary öz içine alýar. Ony elektron marketing ugry boýunça tejribeli maslahatçylar Artýom Krawsow we Ýewgeniý Inžeýew geçirýärler.
200-den gowrak telekeçi okuwa gatnaşmak üçin ýüz tutma ugratdy, bu bolsa türkmen işewürliginiň sanly marketinge we internet üsti bilen satuwlary artdyrmagyň täze gurallaryna bolan barha artýan islegini görkezýär.
ÝTÖB-da soňky döwürde olaryň Türkmenistandaky elektron marketing babatynda telekeçilige goldaw bermäge gönükdirilen maslahat beriş hyzmatlarynyň sanynyň düýpli artandygyny bellediler. Bu hem sanlylaşdyrmany we onlaýn-söwdany makullaýan Bankyň we Türkmenistanyň hökümetiniň ileri tutýan ugurlaryna gabat gelýär.
Ilkinji sapakda gatnaşyjylar Türkmenistanyň onlaýn-bazarynyň gysgaça synyny geçirdiler, internetdäki trendler we söwdanyň artyş nokatlary bilen tanyşdylar. Şeýle hem programma işläp düzüjileri çekmezden, sanly-marketing we internet-dükan döretmek üçin çykdajylary hasaplamak meselesine deglip geçildi.
Häzirki zaman dünýäsinde elektron marketing işewürligi ösdürmek üçin möhüm gural boldy. Ol telekeçilere öz brendiniň tanalyşyny artdyrmaga, müşderileriň ynamdrlygyny ýokarlandyrmaga kömek edýär, şeýle hem auditoriýa bilen ynançly gatnaşyklary ýola goýmaga kömek edýär.
ORIENT habarlar
