Hytaýda syýasy möwsüm açyk
Pekinde 14-nji Milli Halk Gurultaýynyň (NPC) 1-nji sessiýasy açyldy – diýip, Sinhua habar berýär. Öňümizdäki günlerde Hytaýyň deputatlary durmuş-ykdysady üstünlikleri ara alyp maslahatlaşarlar we ýurduň mundan beýläk hem giňişleýin ösüşiniň geljegini meýilleşdirerler.
Däp bolşy ýaly, mejlisiň gün tertibinde Hytaý Halk Respublikasynyň Döwlet Geňeşiniň premýer-ministri Li Kesýanyň hökümetiň işi we geçen ýyl üçin býujetiň ýerine ýetirilişi, NPC-niň hemişelik komitetiniň, Ýokary Halk Prokuraturasynyň we Ýokary Halk Kazyýetiniň işi baradaky hasabatlary ara alyp maslahatlaşyldy. Şeýle hgem kanun çykaryjylar tarapyndan 2023-nji ýyl üçin býujet kabul ediler.
Li Kesýan öz çykyşynda esasy ugurlarda tehnologiki ösüşi gazanmak üçin çeşmelerden netijeli peýdalanmagyň zerurdygyny belledi. Hususan-da, adaty pudaklary, şeýle hem kiçi we orta kärhanalary sanlaşdyrmagyň ähmiýeti nygtaldy.
Döwlet geňeşiniň premýer-ministriniň hasabatyna görä, şu ýyl Hytaýyň global ykdysady ösüşe goşýan goşandy ýene 30 göterimi aşar, jemi içerki önümiň ösüşi 5 göterim töweregi bolar diýlip garaşylýar.
Li Kesýan daşary syýasat mowzugyna ünsi çekip, halkara gatnaşyklaryny ösdürmekde parahatçylykly ýoluň möhümdigini aýtdy: «Biz garaşsyz daşary parahatçylyk we parahatçylykly ösüş syýasatyna ygrarly bolmalydyrys, parahatçylykly ýaşamagyň bäş ýörelgesi esasynda beýleki ýurtlar bilen dostluga we hyzmatdaşlyga çalyşmalydyrys».
Mejlisiň gidişinde parlament agzalary Hytaýyň Döwlet geňeşiniň reforma taslamasyna serederler.
Ýene bäş ýyllyk möhlete gaýtadan saýlanyp biljek Hytaýyň ýolbaşçysy Si Szinpin, ýokary hilli ösüşiň ähli taraplaýyn döwrebap sosialistik ýurt gurmagyň esasy wezipesidigini aýtdy.
4-nji martda Hytaýyň paýtagtynda ýokary pikir alyşýan guramanyň ilkinji mejlisi, ýagny Hytaý Halk Syýasy Geňeşiniň Milli Komitetiniň 14-nji çagyrylşy açyldy. Sessiýa 13-nji marta çenli dowam eder.
ORIENT news
