2023-nji ýyldaky «Ýüpek ýoly» ralli-reýdi ähli ýurtlardaky çapyjylar üçin açykdyr — Çagin
By ýyl «Ýüpek ýoly» ralli-reýdi bütin dünýäniň çapyjylary üçin açyk bolar. Gurnaýjylar ýüz tutmalary ýygnap başladylar we gatnaşyjylar bilen gepleşikleri geçirýärler – diýip, «Ýüpek ýoly» rallisiniň ýolbaşçysy Wladimir Çagin TASS agentligine habar berdi.
«Biz ähli ýurtlardan çapyjylara garaşýarys, gatnaşyň, biz örän şat bolarys we myhmansöýerlik bilen garşy alarys. Biz eýýäm ýüz tutmalary alyp başladyk, gatnaşyjylar bilen gepleşikler geçirilýär, hemmelere garaşýarys», - diýip, Çagin aýtdy.
Ýaryşlar 2023-nji ýylyň 6-njy iýulyndan 15-nji iýulyna çenli geçiriler, onuň ugry Russiýa Federasiýasynyň 13 subýektiniň üstünden geçer.
«Ilkinji gezek ýaryşyň geçiriljek ugruna biziň owadan Ural daglarymyzda ýerleşýän sebitler, Orenburg oblasty, Çelýabinks girizildi. Biz gatnaşyjylara - hem russiýalylara, hem daşary ýurtlylara – biziň ýurdumyzyň täze, iň owadan çäklerini görkezeris, bu biziň taslamamyzyň esasy wezipeleriniň biridir» - diýip, Çagin belledi.
«Ýüpek ýoly» rallisi – ýokary çylşyrymlylyk derejesindäki awtoulag ýaryşydyr, ol 2009-njy ýyldan bäri geçirilýär. Ralli-reýdiň ugry Russiýanyň, Hytaýyň, Gazagystanyň, Mongoliýanyň, Türkmenistanyň çäklerinden geçipdi.
Jemi çapyşygyň dowamlylygy bu ýyl on gün bolar, şol wagtyň içinde gatnaşyjylar 5230 kilometri geçmeli bolarlar. Olardan 2350 ýokary tizlikli geçilýän ýol uçastoklarydyr, olaryň köpüsi garyşyk örtgüde geçer. «Assistans» ugrunyň uzynlygy 3800 kilometre deň bolar.
2023-nji ýylyň ralli Maksatnamasy:
15-nji fewral - gatnaşmak barada ýüz tutmalaryň kabul edilip başlanmagy
01 iýun - Ýüz tutmalaryň kabul edilişiniň tamamlanmagy
5-6 iýul - Administratiw we tehniki barlaglar, (Kazan ş., Tatarystan, RF)
6 iýul - Kazanda dabaraly start berilmegi
6-15 iýul – Russiýanyň çäginden dokuz tapgyr
15-iýul – Moskwada dabaraly finiş
