Russiýanyň turba öndürijileri TAPI-niň owgan böleginiň gurluşygyna goşulmaga taýýar
Dmitriý Žirnow «Izwestiýa» gazetine beren interwýusynda Russiýanyň turba öndürijileriniň Türkmenistandan Pakistana we Hindistana çekilýän gaz geçirijisiniň owgan böleginiň gurluşygyna goşulmaga taýýardygyny belledi – diýip, TASS habar berýär.
Duşenbe güni çap edilen söhbetdeşlikde ilçi iki ýurduň hyzmatdaşlyk etmegi üçin oňaýly mümkinçiligiň bardygyny belledi.
«Bir aý mundan ozal Kabulda Tatarystan Respublikasyndan telekeçileri Owganystanda kömür ýangyç energetikasyny ösdürmek baradaky ähtnama gol çekdiler. Bu Eýran we Pakistan bilen üç taraplaýyn taslamadyr»- diýip, ol gazete gürrüň berdi.
Mundan başga-da, RF-dan inženerler Kabulda bug gazanlaryny, ýylylyk torlaryny, suw üpjünçilik ulgamlaryny, elektrik kiçi beketlerini barladylar we jemagat ulgamayny gaýtadan dikeltmegiň meýilnamasyny taýýarladylar. RF-dan bilermenler şeýle hem Özbegistandan Owganystanyň üsti bilen Pakistana çekilýän demir ýoluň gurluşygy meselesi boýunça tehniki topara hem gatnaşýarlar.
«Owgan şäherlerinde ilat üçin häzirki zaman lukmançylyk merkezlerini döretmek boýunça taslama taýýarlanylýar. Biziň telekeçilerimiz Salan tonnelini döwrebaplaşdyrmaga hem gatnaşyp bilerler. Owganystan bilen hyzmatdaşlyk etmek boýunça işewür geňeş işleýär» - diýip, Žirnow neşire habar berdi.
Bularyň ählisi RF bilen Owganystanyň arasyndaky söwdada öz beýanyny tapýar. Ilçiniň sözlerine görä, bir ýylyň dowamynda ýurtlaryň arasyndaky haryt dolanyşygy 40% artdy.
