Tbilisi we Aşgabat syýahatçylygy täzeden dikeldýärler: gün tertibinde göni uçuşlar we «wizasyz» syýahat
Gruziýanyň Ykdysadyýet we durnukly ösüş ministrliginiň şypahanalary ösdürmek agentligi, Aşgabatda ýurdunyň syýahatçylyk mümkinçiliklerini hödürledi. Duşuşyk 1-nji martda «Ýyldyz» myhmanhanasynda pudak ýolbaşçylarynyň we hünärmenleriniň, syýahatçylyk agentlikleriniň we Türkmenistanyň awiakompaniýasynyň gatnaşmagynda geçirildi.
Çäräni, Gruziýanyň Türkmenistandaky ilçisi Konstantin Sabiatişwili açdy we iki ýurduň arasyndaky gatnaşyklaryň depginli ösüşini belläp geçdi.
Ilçi, Gruziýanyň we Türkmenistanyň mundan beýläk-de netijeli hyzmatdaşlyk etmek üçin möhüm ädimleri ätýändigini belläp, syýahatçylyk pudagynda aragatnaşyklar üçin amatly şertleri döredýän iki ýurduň bähbitli geografiki ýerleşişini we umumy ähmiýetini nygtady. Pandemiýadan öňki döwürde, 2019-njy ýylda, Türkmenistandan Gruziýa saýahat edenleriň sanynyň 13000-den gowrakdygyny bellemelidiris.
Gruziýanyň şypahanalary ösdürmek boýunça müdiri Aleksandr Onoprişwili öz çykyşynda Türkmenistanly syýahatçylaryň sanyny artdyrmakdaky möhüm ugurlara ünsi çekdi. Mysal hökmünde, Bakuriani şäherinde şu günler geçirilýän fristaýl we snoubord boýunça dünýä çempionatyna salgylandy. Tbilisiden üç sagat uzaklykda ýerleşýän dag lyja şypahanasy Kawkazyň iň gadymy şypahanasydyr.
─ Häzirki wagtda Gruziýada köp myhmanhana gurulýar. Şypahanalary ösdürmek üçin tehniki we ykdysady şertler döredilýär. Biz bu ugurdaky meýilnamalarymyz we birnäçe maýa goýum taslamalarymyz barada gürrüň bermek üçin Türkmenistana geldik - diýip, Aleksandr Onoprişwili ORIENT bilen söhbetdeşlikde aýdýar.
Onuň aýtmagyna görä, Gruziýada dürli ýurtlardan köp sanly jahankeşdeleri özüne çekmek üçin esas döredilipdir. Şolaryň arasynda Türkmenistan hem möhüm orny eýeleýär.
Türkmenistanyň Medeniýet ministrliginiň Syýahatçylyk bölüminiň müdiriniň orunbasary Gülşat Bakyýewa öz çykyşynda ýurdumyzda içerki syýahatçylygyň işjeň ösmeginden başga-da, daşary ýurt syýahatçylygyndaky hyzmatdaşlygy täze derejä çykarmak üçin ähli mümkinçilikleriň döredilendigini belledi.
Gruziýanyň şypahanalary ösdürmek boýunça agentliginiň wekili Lela Poshweraşwili öz ýurdunyň birnäçe syýahatçylyk «emelleri», şol sanda gadymy taryhy we medeniýeti bilen baglanyşyklylary, magnitli çägeli plýažy bilen meşdur bolan, Ureki diýlen ýerde Gara deňziň kenaryndaky Kobuleti şäherçesi we çalt ösýän hem-de häzirki zaman infrastrukturaly Anakliýa şypahanasy barada gürrüň berdi.
Agentligiň başga bir wekili Hatuna Saganelidze, Gruziýanyň mineral suwlary bilen bejermekde ýöriteleşen – Abastumani, Ahtala, Bahmaro, Borjomi, Lebarde, Udžarta we başga balneologiki şypahanalary barada aýtdy.
Saganelidze, Lakbe suw howdany, Arhiloskalo howa şypahanasy, Nadarbazewi emeli köli we ş.m. ýaly maýa goýum taslamalarynyň durmuşa geçirilip bilinjekdigi barada durup geçdi.
─ Biz Aşgabat – Tbilisi göni uçuşlaryň ýola goýulmagyna sabyrsyzlyk bilen garaşýarys. Iýun aýynda Tbiliside hökümetara komissiýa geçiriler. Onda Türkmenistanyň raýatlary üçin wizasyz tertibiň girizilmegi ýaly köp meseleler ara alnyp maslahatlaşylar. Ýurduňyzyň ýaşaýjylary biziň ajaýyp paýtagtymyzy görmeli, Gruziýanyň raýatlary bolsa Aşgabat ýaly ajaýyp şähere baryp görmeli –diýip, Gruziýanyň şypahanalary ösdürmek boýunça müdiri Aleksandr Onoprişwili sözüni jemledi.
Artur PETROSÝANS
