«АртИст» türkmen teatry GDA ýurtlarynyň Sankt-Peterburgda geçiriljek «Russiýada duşuşyklar» atly teatr festiwalyna gatnaşar
Sankt-Peterburgyň iň gadymy festiwaly şu ýyl çärýek asyrlyk ýubileýini belleýär. Bu ýyl rus dramaturgy Aleksandr Ostrowskiniň 200 ýyllygyna bagyşlanan GDA ýurtlarynyň XXV halkara «Russiýada duşuşyklar» atly teatr festiwaly, 7-nji aprelden 16-njy aprel aralygynda Demirgazyk paýtagtda geçiriler - diýip, GDA ýurtlarynyň portaly habar berýär.
Sankt-Peterburga Arkalaşygyň onlarça ýurtlarynyň, ýagny Azerbaýjanyň, Ermenistanyň, Abhaziýanyň, Belarusiýanyň, Gazagystanyň, Gyrgyzystanyň, Täjigistanyň, Russiýanyň, Özbegistanyň rus dilli teatrlaryň döredijilik toparlaryny gelerler.
Forumda Türkmenistana paýtagtymyzyň «АртИст» teatrynyň topary Aleksandr Ostrowskiniň eseri esasynda sahnalaşdyrylan «Düşewüntli ýer» atly spektakly bilen wekilçilik eder. Onuň ilkinji görkezilşi Aşgabatda geçen ýylyň noýabr aýynda geçirilipdi. Oýny goýan režissýor – Mekan Jumabaýew, baş rollary ýerine ýetirýän artistler – Wasiliý Andronow, Igor Annagylyjow, Nina Supanko, Mekan Jumabaýew we başgalar.
Sankt-Peterburgyň teatr festiwalynyň guramaçysy bolup «Baltika öýi» teatr-festiwaly çykyş edýär. Däp bolşy ýaly, foruma gatnaşyjylar Russiýanyň daşynda işleýän rus teatrlarydyr. Döredijilik toparlary we sungat işgärleri her ýyl medeni alyş-çalyş we bilelikdäki halkara taslamalary döretmäge täze mümkinçilikler açyp, Sankt-Peterburgyň sahnasynda iň gowy oýunlaryny hödürleýärler.
Festiwal maksatnamasy «Daşary ýurtdaky rus teatry rus medeniýetiniň instituty hökmünde» we «Ýaş režissýorlaryň ýarmarkasy» atly halkara maslahatlaryň geçirilmegini hem öz içine alýar. Bu ýerde, Russiýanyň Döwlet sahna sungatlarynyň institutynyň talyplary we uçurymlary öz täze teatr taslamalaryny hödürlärler we geljekki eserleriniň tanyşdyrylyş dabarasyny gurarlar.
ORIENT news
