Oguzhan adyndaky uniwersitetde Gurbannazar Ezizowyň doglan gününi belläp geçdiler
Türkmenistanyň Oguzhan adyndaky inžener-tehnologiýalar uniwersitetinde zehinli türkmen şahyry Gurbannazar Ezizowyň ömrüne we döredijiligine bagyşlanan edebiýat agşamy geçirildi – diýip, ýokary okuw mekdebiniň metbugat üçin maglumatynda habar berilýär.
Çäre şahyryň baharyň ilkinji gününde bellenip geçilýän doglan gününe bagyşlandy.
Ýokary okuw mekdebiniň mugallymlary we talyplary Gurbannazar Ezizowyň döredijilik mirasy barada gürrüň etdiler. Goşgulary labyzly okamak bilen bir hatarda, bilim edarasynyň talyplary şahyryň goşgularynyň esasynda goýlan sahna görkezişlerini hödürlediler.
Söz ussadynyň doglan gününde okuwa başlanmazdan öň uniwersitetiň çägindäki ähli radio nokatlardan onuň ömri we döredijiligi barada maglumat iňlis dilinde berildi, onuň «Maňa seniň gözleriňden gitme ýok» diýen meşhur goşgusy türkmen we iňlis dillerinde ýaňlandy. Sapaklaryň arasyndaky arakesmede Ezizowyň döredijiliginiň muşdaklary onuň «Türkmen sährasy» eserini ýerine ýetirdiler.
Gurbannazar Ezizow ХХ asyryň türkmen şahyrlarynyň parlak ýyldyzlarynyň biridir. Özüniň gysga ömrüniň dowamynda şahyr diňe bir özüni tanatman, eýsem edebiýatyň taryhyna girmegi we halkyň hakydasynda galmagy başardy.
ORIENT habarlar
