Mary welaýatynyň käbir ilatly ýerleriniň telefon kodlary üýtgedi
Mary welaýatynyň Serhetabat we Oguzhan etraplarynyň telefon kodlary üýtgedi – diýip, «Marytelekoma» salgylanyp, “Maru-şahu jahan” gazeti habar berýär.
Üýtgemeler bu ilatly ýerleriň ýatyrylmagy we olaryň dolandyryş birliginiň Tagtabazar, Murgap we Sakarçäge etraplaryna berilmegi bilen baglanyşykly girizildi.
Serhetabat şäheriniň we Tagtabazar etrabynyň düzümine giren geňeşlikleriň telefon kodlary 8-00-568-3-XX-XX boldy.
Murgap etrabynyň düzümine goşulan Oguzhan, Deňizhan şäherçeleriniň, şeýle hem Deňizhan we Dostluk geňeşlikleri 8-00-565-6-XX-XX telefon koduny aldylar.
Döwletli zaman, Parahat, Şatlyk şäherçeleriniň, Ýyldyzhan, Bereket, Garaşsyzlyk daýhan birleşikleriniň, şeýle hem Merdan geňeşliginiň Azatlyk obasynyň telefon kody 8-00-566-6-XX-XX koda üýtgär. Olar Sakarçäge etrabynyň düzümine goşuldylar.
Goşmaça maglumaty 071 gysga belgiden bilip bolýar.
ORIENT habarlar
