Türkmen-tatar iş topary mart aýynda Aşgabatda gepleşikleri geçirer
Bilelikdäki türkmen-tatar iş toparynyň söwda we ykdysadyýet, ylym we tehnika, şeýle hem medeni hyzmatdaşlyk boýunça mejlisi 15-16-njy mart aralygynda Aşgabatda geçiriler.
Forumy geçirmek baradaky ylalaşyk, Türkmenistanyň Kazandaky Baş konsuly Güýç Garaýew bilen Tatarstan Respublikasynyň Saglyk ministriniň wezipesini wagtlaýyn ýerine ýetiriji Marsel Minnulliniň arasynda geçirilen duşuşykda gazanyldy – diýip, türkmenleriň Kazandaky diplomatik wekilhanasynyň saýty habar berýär.
Duşuşygyň möhüm mowzuklaryndan biri, iki ýurduň saglyk işgärleriniň arasynda ylmy we amaly hyzmatdaşlygy giňeltmegiň mümkinçiligini ara alyp maslahatlaşmak boldy. Saglygy goraýyş we derman senagaty pudagynyň Türkmenistan bilen Tatarstanyň arasyndaky hyzmatdaşlygyň geljegi uly ugurlaryndan biridigi bellendi.
Bu pudakdaky ösüşler we toplanan tejribe diýseň täsir galdyryjy – diýip, türkmen diplomaty aýtdy. Gürrüň saglyk pudagyndaky bilim taslamalary barada bolyp, ýagny soňky ýyllarda türkmen lukmanlary professor I. Fedorow adyndaky Kazan okuw merkezinde we «Talar» lukmançylyk okuw merkezinde dürli hünärler boýunça okuw we hünär derejesini ýokarlandyryş kurslaryny geçdiler.
Häzirki wagtda Saglygy goraýyş ministrligi üçin 2021-nji ýylda Tatarstan Respublikasyndan satyn alnan iki dikuçar Türkmenistanyň saglygy goraýyş pudagynda işleýär. Şeýle hem, Tatarstanyň «Eidos-Medicine» JÇJ-i bilen Türkmenistanyň Saglygy goraýyş ministrliginiň Halkara okuw-ylmy merkeziniň hyzmatdaşlygynda lukmançylyk ulgamynda simulýasiýa tehnologiýalaryny ösdürmek boýunça işler alnyp barylýar.
Duşuşykda taraplar ylmy we amaly gatnaşyklar we lukmançylyk işgärleriniň arasynda yzygiderli tejribe alyşmak meselelerini hem ara alyp maslahatlaşdylar.
ORIENT news
