Rus-eýran kompaniýasy ýükleri Eýranyň çäginden üstaşyr geçirmek bilen meşgullanar
Hazar toparynyň we Eýranyň iri "Mostazafan" gaznasynyň gatnaşmagynda döredilen ulag kompaniýasy ýükleri Eýranyň çäginden üstaşyr geçirmek bilen meşgullanar. ““Lotos” aýratyn ykdysady zolagy” Paýdarlar jemgyýetiniň baş müdiri Sergeý Miluşkiniň pikiriçe, bu “Demirgazyk-Günorta” halkara ulag geçelgesi (ITC) boýunça ýük daşamagy çaltlaşdyrar – diýip, TASS habar berýär.
“Öňümizdäki ýyllarda biz transhazar ýoluny Hazar sebitiniň esasy ugry hökmünde görýäris, sebäbi günbatar ugry ýola goýmak üçin Eýranda demir ýoluň gurulmagyna we gündogar ugrunyň Türkmenistanyň üsti bilen geçirijilik ukybynyň artdyrylmagyna, azyndan birnäçe ýyl gerek. Ýükleri häzirki wagtda aýratyn ykdysady zolagyň dolandyryjysynyň gatnaşmagynda daşamak üçin rus-eýran kompaniýasy hasaba alyndy, ol awtoulag arkaly Eýranyň çäginden ýükleriň üstaşyr daşalyşy bilen meşgullanar. Eýran tarapyndan bu taslama ulaglaryň öz wagtynda üpjün edilmegini we ýüküň howpsuzlygyny kepillendirýän kompaniýa (Eýranyň “Mostazafan” gaznasyna girýär) gatnaşýar" – diýip, Miluşkin aýtdy.
Ol: “Bu Eýranyň demirgazyk portlaryndan günorta portlaryna üstaşyr ýük gatnawynyň päsgelçiliksiz ösüşini üpjün eder we “Demirgazyk-Günorta” halkara ulag geçelgesiniň ugry boýunça multimodal ýük daşama gatnawlaryny ösdürer” - diýip belläp geçdi.
21-nji fewralda Russiýanyň Prezidenti Wladimir Putin Federal Assambleýa gönderen ýüzlenmesinde Russiýanyň “Demirgazyk-Günorta” halkara ulag geçelgesiniň ösüşine aýratyn üns berjekdigini aýtdy. Bu Hindistan, Eýran, Päkistan we Ýakyn Gündogar ýurtlary bilen işewür hyzmatdaşlygyň täze ugurlaryny açar.
ORIENT news
