Tambow oblasty Türkmenistan bilen has ýakyn gatnaşyklary gurmaga ymtylýar
Russiýanyň hökümetinde Tambow oblastyna wekilçilik edýän Murat Grigorýew sebitiň Türkmenistan bilen toplumlaýyn özara hyzmatdaşlygy ýola goýmaga ymtylýandygyny beýan etdi.
Şunuň ýaly taýýarlyk barada ol Türkmenistanyň Russiýadaky ilçisi Batyr Niýazlyýew bilen duşuşykda beýan etdi – diýip, türkmen diplomatik wekilhanasynyň resmi saýty habar berýär.
Şunda ikitaraplaýyn hyzmatdaşlygyň ugurlarynyň giň mümkinçiliklere eýedigi nygtalyp, onuň oba hojalygyny, senagaty, hyzmatlar pudagyny, ylmy, bilimi we beýleki ugurlary gurşap alýandygy bellenildi. Bu hyzmatdaşlyk türkmen-russiýa döwletara hyzmatdaşlygynyň möhüm düzüm bölegi bolmalydyr.
Duşuşygyň netijeleri boýunça ygtyýarlandyrylan wekiller Türkmenistan bilen Tambow oblastynyň arasynda aragatnaşyklary ýola goýmak boýunça ädimleriň dowam etdirilmegi barada ylalaşdylar.
Häzirki wagtda Türkmenistan Russiýa Federasiýasynyň subýektleri bolan Sankt-Peterburg, Tatarystan, Astrahan we Çelýabinsk oblastlary bilen göni aragatnaşyklar baradaky ylalaşyklaryň çäklerinde ýakyndan hyzmatdaşlyk edýär.
ORIENT habarlar
