Samarkand şäherinde ABŞ we Merkezi Aziýa ýurtlarynyň arasynda söwda we maýa goýum duşuşygy geçiriler
Samarkand şäherinde ABŞ bilen Merkezi Aziýa ýurtlarynyň arasynda söwda we maýa goýum boýunça Çarçuwaly ylalaşygyň (TIFA) Geňeşiniň mart aýynda geçiriljek mejlisi, 1-nji martda Özbegistanyň Prezidenti Şawkat Mirziýoýew bilen ABŞ-nyň Döwlet sekretary Entoni Blinkeniň ýolbaşçylygyndaky wekiliýetiň duşuşygyň mowzuklaryndan biri boldy.
«Syýasy, söwda we ykdysady, maýa goýumlary, bilim, medeni we ynsanperwer ugurlardaky ikitaraplaýyn gatnaşyklaryň gün tertibiniň möhüm meselelerine, şeýle hem sebit hyzmatdaşlygynyň wajyp ugurlaryna garaldy» – diýlip, Özbegistan Respublikasynyň ýolbaşçysynyň saýtynda bellenýär.
Entoni Blinken öwrüp bolmaýan demokratik özgertmeleri we ýurtda amala aşyrylýan durmuş-ykdysady üýtgetmeleri doly goldaýandygyny beýan etdi. Esasan hem adam hukuklaryny goramagy we gender deňligini, mejbury zähmet bilen göreşmegi üpjün etmekde, söz erkinligi we habar beriş serişdelerine goldaw bermekde, raýat jemgyýeti institutlarynyň ösüşinde we beýleki köp ugurlardaky üýtgetmelerde uly ösüş gazanylandygy bellenildi.
Söwda we ykdysady, maýa goýum we innowasiýa hyzmatdaşlygyny ösdürmäge, Özbegistanyň bazarynda öňdebaryjy Amerikan kompaniýalarynyň sanyny artdyrmaga we esasanam ýokary tehnologiýaly pudaklarda hyzmatdaşlygyň taslamalaryny durmuşa geçirmäge aýratyn üns berildi.
Medeni we ynsanperwer gatnaşyklary ösdürmek üçin bar bolan giň mümkinçilikler, şol sanda ýaş nesil tarapyndan iňlis dilini öwrenmek we ýurdumyzda ökde mugallymlary taýýarlamak ugrurlarynda meýilnamalar bellendi.
Sebit ýurtlarynyň durnukly ösüşine ýardam etmek, işewürlik we maýa goýum gurşawyny kämilleşdirmek, «ýaşyl energetikany» ösdürmek we bilelikdäki bilim maksatnamalaryny durmuşa geçirmek ýaly ugurlarda durulup geçildi.
Şeýle hem Owganystanda parahatçylykly çözgüt meselesinde giň halkara hyzmatdaşlygy, parahatçylygy ýola goýmak we owgan ykdysadyýetini dikeltmek üçin sebit infrastruktura taslamalaryny goldamak meseleleri ara alnyp maslahatlaşyldy.
ORIENT news
