Gazagystanyň Prezidenti we ABŞ-nyň Döwlet sekretary hyzmatdaşlygy çuňlaşdyrmak barada ylalaşdylar
Gazagystanyň Prezidenti Kasym-Jomart Tokaýew we ABŞ-nyň Döwlet sekretary Entoni Blinken sişenbe güni geçirilen duşuşygyň dowamynda iki ýurduň howpsuzlyk, energetika, söwda we maýa goýum ýaly ugurlardaky hyzmatdaşlygyny çuňlaşdyrmak barada ylalaşdylar – diýip, Tokaýewiň metbugat gullugy habar berýär.
Respublikanyň baştutany amerikaly diplomat bilen salamlaşyp, diplomatik gatnaşyklaryň ýola goýlan pursatyndan başlap, Gazagystan bilen Amerikanyň Birleşen Ştatlarynyň ikitaraplaýyn we köptaraplaýyn görnüşde göreldeli hyzmatdaşlygy gurandygyny aýtdy.
Şeýle hem, Gazagystanyň Prezidenti “Amerikanyň Birleşen Ştatlarynyň respublikanyň garaşsyzlygyny, çäk bitewiligini we özygtyýarlylygyny yzygiderli we pugta goldaýandygy üçin" minnetdarlyk bildirdi.
Ykdysady hyzmatdaşlyk barada durup geçen Tokaýew ABŞ-nyň Gazagystanyň umumy maýa goýumlary 62 milliard dollardan gowrak bolan iň uly maýadarlardan biridigini aýtdy. Gazagystanyň lideri Amerikanyň Birleşen Ştatlarynyň C5+1 formatda (Merkezi Aziýa ýurtlary we ABŞ) hyzmatdaşlygy giňeltmek ugrundaky tagallalaryny goldady we Merkezi Aziýa ýurtlarynyň we Amerikanyň Birleşen Ştatlarynyň daşary syýasat edaralarynyň ýolbaşçylarynyň duşuşygynyň Astanada geçirilmeginiň möhümdigini belledi.
Blinken, öz gezeginde Gazagystanyň baştutanynyň Astanada "Merkezi Aziýa hyzmatdaşlaryny" ýygnandygy üçin Tokaýewe minnetdarlyk bildirdi.
"Biz, kärdeşlerimiz - daşary işler ministrleri bilen bilelikde sebiti birleşdirmek, has berk gatnaşyklary gurmak, has ýakyn aragatnaşyk saklamak, amaly hereketlere ünsi jemlemek boýunça has anyk işlere gatnaşarys diýip, umyt edýärin. Meniň pikirimçe, bu hem Merkezi Aziýa halklaryna, hem-de ABŞ üçin peýdaly bolar. Biz özara gatnaşyklarymyzy iň ýokary derejä çykarmak isleýäris" – diýip, Blinken aýtdy.
ORIENT news
