Hançžouda Aziýa oýunlary 2022-ni galyndysyz geçirmek boýunça meýilnama hödürlendi
Hançžouda geçiriljek XIX tomusky Aziýa oýunlary 2022-nji gurnaýjylar köp sportly çäräni hiç hili galyndysyz geçirmek boýunça hereketleriň meýilnamasyny hödürlediler.
Meýilnamada Oýunlarda zyňyndylaryň mukdaryny azaltmaga gönükdirilen birnäçe çäreler beýän edilýär. Hususan-da, bu ekologik ýaşaýyş jaýynyň gurulmagy, kagyzsyz we gaýtadan dikeldilýän materiallaryň ulanylmagy, şeýle hem energiýany tygşytlamagyň we zyňyndylary kemeltmegiň gazanylmagydyr.
Meýilnama tarapyndan göz öňünde tutulan beýleki çäreleriň arasynda howply zyňyndylar bilen hapalanmak töwekgelçiligini dolandyrmak we olaryň öňüni almak üçin utgaşdyryjy mehanizmiň döredilmegi bar.
Hançžou-2022 gurnaýjylaryna çäräniň dowamynda ikinji derejeli çig maly klassifikasiýa etmegiň ulgamyny işläp düzmek we «Galyndysyz Aziýa oýunlary» konsepsiýasyny meşhur etmek tabşyryldy.
«Bu meýilnamanyň ýerine ýetirlmegi bilen baglanyşykly Çžesýan welaýaty uly göwrümdäki çäre üçin «nol galyndylaryň» ilkinji standart ulgamyny döreder. Geljekde bu gymmat bahaly tejribe galyndysyz şäherleriň gurluşygynda we beýleki çäreleriň geçirilişinde ulanylar» - diýlip, Hançžou 2022 oýunlarynyň Guramaçylyk komitetiniň beýanatynda aýdylýar.
Çžesýan welaýaty Hançžou şäherini «galyndysyz şäher» etmäge ymtylýandygyny belläp geçmelidiris.
XIX tomusky Aziýa oýunlary Hançžouda 2023-nji ýylyň 23-nji sentýabryndan 8-nji oktýabry aralygynda geçiriler.
ORIENT habarlar
