Türkmenistanyň gulluga täze kabul edilen gümrükçileri taýýarlyk okuwyna girişdiler
Türkmenistanyň Döwlet gümrük gullugynyň okuw merkezinde ýurduň gümrük edaralarynyň gulluga täze kabul edilen işgärlerini başlangyç taýýarlamagyň şu ýyldaky ilkinji okuwy başlandy. Bu barada edaranyň resmi saýty habar berýär.
Iki aýyň dowamynda 17 gümrükçi gümrük işi barada esasy bilime eýe bolarlar, işiň inçe syrlary bilen tanşarlar. Hususanda, gümrük gözegçiligini we düzgünlerini guramak babatynda, şeýle hem hukuk bozulmalara garşy göreşmäge degişli maglumatyň uly göwrümini özleşdirerler, gümrük tölegleri, statistika, ulanylýan maglumatlar tehnologiýalary babatynda habardarlygy ýokarlandyrarlar.
Her bir tematiki okuw tamamlanandan soňra, diňleýjiler aralyk synag testlerini geçerler, onuň netijeleri jemleýji synagda göz öňüne tutular.
Türkmenistanyň Döwlet gümrük gullugynyň komissiýasynyň tamamlaýjy bilim barlagy işgäriň ýurduň gümrük edaralarynda işini dowam etdirjekdigini ýa-da etdirmejekdigini kesgitlerýär.
Başlangyç taýýarlyk okuwy haýsy bölümde gulluk etjekdigine garamazdan gümrük gullugynyň her bir täze işgäri üçin hökmany şert bolup durýar.
ORIENT habarlar
