Türkmenistan daşky gurşawyň meseleleri boýunça «ÝB-MA» maslahatyna gatnaşar
Türkmenistanyň wekiliýeti «ÝB-Merkezi Aziýa» atly daşky gurşaw we suw serişdeleriniň meseleleri boýunça 23-24-nji fewralda Rimde boljak ýokary derejedäki 7-nji Maslahata gatnaşar.
Maslahatyň çäklerinde Italiýanyň Daşary işler ministrliginde daşky gurşaw we suw serişdeleri boýunça hyzmatdaşlyk boýunça ÝB-MA Platformasynyň 2019-njy ýylyň ýanwaryndan bäri döwürdäki netijeleri hödürlener, Platformanyň 2023-2025-nji ýyllar üçin ileri tutulýan ugurlary kesgitlener.
Gatnaşyjylar şeýle hem daşky gurşawy goramak babatynda mümkinçilikleri ösdürmek, Merkezi Aziýada howanyň üýtgemegi we suw serişdeleri boýunça amala aşyrylýan iş ýüzündäki ädimleri maslahatlaşarlar we ylalaşarlar.
Duşuşyk Merkezi Aziýa ýurtlarynyň hökümetleriniň, Ýewropa Birleşiginiň we ÝB-niň agza döwletleriniň daşky gurşaw, howanyň üýtgemegi we suw serişdeleri babatynda syýasata jogapkär wekillerini, halkara, sebitleýin we hökümete degişli bolmadyk guramalaryň wekillerini bir meýdançada ýygnar.
Çäräniň çäklerinde Ýewropa Birleşiginiň Merkezi Aziýa boýunça ýörite wekili Terhi Hakalanyň, Italiýanyň parlamentiniň agzasy, daşary işler ministriniň orunbasary we halkara hyzmatdaşlyk boýunça ministriň orunbasary Edmondo Çiriýelliniň çykyş etmegine garaşylýar.
ORIENT habarlar
