Türkmen boksçysynyň Moskwada geçiren tutluşygy deňlik bilen tamamlandy
Türkmen boksçysy Yhtiýar Maşaripow bilen Russiýanyň wekili Sergeý Makedonyň arasyndaky söweş tehniki deňlik bilen tamamlandy. Söweş 17-nji fewralda Moskwada “Pravda Old School Boxing” ýaryşynyň çäklerinde geçirildi.
Dört tapgyra meýilleşdirilen ikinji orta agram derejesindäki tutluşyk üçünji raundda tamamlandy.
Iki boksçy üçinem bu duşuşyk halkara professional derejesinde ilkinji söweşidir.
Birinji tapgyrda Maşaripow aralygy gözegçilikde saklamak arkaly artykmaçlygy ele aldy. Ikinji üç minutlykda türkmen boksçysy birnäçe urgy geçirip, söweşi işjeň ýagdaýda dowam etdirdi.
Üçünji tapgyr deň söweşde geçirildi, ýöne gutarmagyna otuz sekunt galanda, boksçylar kelleleri bilen çaknyşdylar. Netijede, rus söweşijisine agyr şikes ýetdi we lukmanlaryň ündemegi bilen söweş togtadyldy.
Gysga çekişmeden soň, eminler topary söweşiň netijesini tehniki deňlik diýip yglan etdi.
28 ýaşly Yhtiýar Maşaripow Daşoguz şäherinde doguldy. Ol Türkmen döwlet bedenterbiýe we sport institutynyň talyby. Sport ussatlygyna dalaşgäriň soňky sport üstünligi - boks boýunça Türkmenistan-2022 kubogynyň bürünç medalydyr.
Onuň garşydaşy – russiýaly 32 ýaşly türgen Sergeý Makedon. Boks boýunça sport ussatlygyna dalaşgär, şeýle hem karate boýunça sport ussady.
“Pravda Fighting Championship” – 2021-nji ýylda başlanan rus mahabaty. Bäsleşigiň çäginde boks söweşleri we garyşyk başa-baş söweş sungaty boýunça duşuşyklar geçirilýär.
Artur PETROSÝANS
