Türkiýedäki betbagtçylyk bilen Türkmenistanyň raýatlary hem ýüzbe-ýüz boldular
Ýer titremeleriniň birnäçesini başyndan geçiren Türkiýede betbagtçylyga duçar bolanlary arasynda Türkmenistanyň raýatlary hem bar. Bu barada Türkmenistanyň Halk Maslahatynyň Başlygy Gurbanguly Berdimuhamedow Türkiýäniň Aşgabatdaky ilçihanasyna baryp görende aýtdy – diýip, TDH habar berýär.
Hälk häkimiýetiniň ýokary edarasynyň baştutany türkmen döwletiniň özüniň her bir raýaty üçin ynamly daýançdygyny we, eger-de mesele ýüze çyksa, onda degişli edaralaryň zerur bolan kömegi berjekdigini nygtady.
Şu gün resmi metbugatda Türkiýedäki tebigy betbagtçylyga duçar bolan Türkmenistanyň raýatlarynyň, şeýle hem olaryň garyndaşlarynyň ýüz tutup biljek gyzgyn aragatnaşyk üçin telefon belgilerini çap edildi.
Türkmenistanyň Daşary işler ministrligi:
+99312445688
+99312445722
Türkiýe Respublikasyndaky Türkmenistanyň ilçihanasy:
+90(505)1315685
+903124417122(23,24)
tmankara@yahoo.com
Stambul şäherindäki Baş konsullyk:
+905375200935
+902126620221
stambulconstm2@gmail.com
Anadolu agentliginiň berýän maglumatyna görä, Türkiýedäki ýer titremesiniň pidalarynyň sany 9-njy fewraldaky ýagdaýa görä 9 müň 57 adam. Ýurt boýunça ýaralananlaryň sany – 52 müň 979. Tebigy betbagtçylyk 6 müň 444 binany weýran etdi.
Türkmenistanyň Halk Maslahatynyň Başlygy Gurbanguly Berdimuhamedow Türkiýäniň Aşgabatdaky ilçihanasyna baran mahaly wepat bolanlaryň hossarlaryna we ýakynlaryna çuňňur gynanç sözlerini bildirdi, ejir çekenlere tiz sagalmagy arzuw etdi.
Ozal 7-nji fewralda Türkiýäniň günortasyndaky Gaziantep şäherine Türkmenistandan ynsanperwer kömekli uçary geldi, onda şeýle hem lukmanlar we saglyk işgärleri bar. Ýer titremesinde ejir çekenlere Türkmenistan kömek üçin zerur bolan dermanlary, lukmançylyk serişdelerini we dokma önümlerini iberdi.
ORIENT habarlar
