“Mugallymlaryň zähmet hakyny ýokary derejede bellemek gerek” - Türkmenistanyň Prezidenti
― Mugallymçylyk käriniň abraýly we ýaşlary özüne çekiji bolmagy üçin olaryň zähmet hakyny ýokary derejede bellemek gerek - diýip, Türkmenistanyň Prezidenti Serdar Berdimuhamedow anna güni ýurduň Ministrler Kabinetiniň mejlisinde aýtdy. Bu barada Türkmenistanyň Döwlet habarlar agentligi (TDH) habar berýär.
Mundan başga-da, orta we ýokary okuw mekdeplerinde mugallymlaryň hünärini ýokarlandyrmak boýunça yzygiderli işleri geçirmäge uly üns bermek wajypdyr – diýip, döwlet Baştutany nygtady.
Şeýle hem, Prezident çagalaryň döwrebap bilim-terbiýe almagy üçin ýokary şertleri döretmek, ýaş nesliň tebigy zehinini, ukyplaryny, başarnyklaryny ýüze çykarmak we ösdürmek üçin bilim edaralarynyň işlerini kämilleşdirmek, ulgamlaýyn alyp barmak, okuw meýilnamalaryny, maksatnamalary, okuw kitaplaryny ösen halkara tejribelere laýyklykda döwrebaplaşdyrmak boýunça işleri dowam etdirmegi tabşyrdy.
Mejlisde daşary ýurtlaryň ýokary okuw mekdepleriniň ýurtdumyzda zerur bolan bölümlerini açmak boýunça degişli işleri geçirmegiň möhümdigine üns çekildi.
ORIENT news
