Türkmenistanyň ilçisi Putin bilen geçirilen Owganystandaky ýagdaýlary ara alyp maslahatlaşmalara gatnaşdy
Çarşenbe güni Russiýanyň prezidenti Wladimir Pitin birnäçe ýurtlaryň howpsuzlyk meseleleri boýunça wekilleri bilen owgan meselesine bagyşlanylan duşuşyk geçirdi.
Duşuşyga RF-niň Howpsuzlyk geňeşiniň sekretary Nikolaý Patruşew, şeýle hem onuň kärdeşleri – Hindistandan, Eýrandan, Gazagystandan, Gyrgyzystandan, Täjigistandan we Özbegistandan milli howpsuzlyk boýunça geňeşçiler hem-de howpsuzlyk geňeşleriniň sekretarlary gatnaşdylar.
Türkmenistana we Hytaýa Russiýa Federasiýasyndaky diplomatik wekilhanalaryň baştutanlary wekilçilik etdiler. Hususan-da, maslahatlaşmalara Türkmenistanyň Adatdan daşary we Doly ygtyýarly ilçisi Batyr Nyýazlyýew gatnaşdy.
Ozal howpsuzlyk boýunça wekiller bäşinji köptaraply duşuşygy geçiripdiler. Ol ýüzbe-ýüz ýagdaýda Moskwada geçirildi. Şeýle maslahatlaşmalaryň dördünji tapgyry geçen ýylyň maýynda Duşenbede, üçünjisi – 2021-nji ýylyň noýabrynda Nýu-Delide geçirilipdi.
Putin daşary ýurtlaryň howpsuzlyk boýunça wekilleri bilen yzygiderli söhbetdeş bolýar. Geçen sentýabrda we oktýabrda onuň GDA döwletleriniň howpsuzlyk edaralarynyň we ýörite gulluklarynyň ýolbaşçylary bilen duşuşyklary boldy. Şolaryň barşynda hem Owganystandaky ýagdaýlara deglip geçildi.
RF-niň prezidenti nobatdaky duşuşygy açyp, häzir dünýäde dartgynly ýagdaýlaryň, “şol sanda Ukraina tarapda” dartgynlygyň köpdügini belledi.
— Biz muňa oňat düşünýäris, ynsabymyzyň öňünde borçlanýarys. Ýöne, bu Owganystandaky ýagdaýlaryň ähmiýetini peseltmeýär, ol biziň üçin hemişe möhüm bolupdy, häzirki wagtda bolsa iki esse möhümdir, sebäbi biz günorta serhetlerimizde ýene-de nähilidir bir dartgynlylyklaryň ýüze çykmagyny islemeýäris – diýip, Putin aýtdy.
Ol Owganystanda millionlarça adamlaryň hökmany ýagdaýda ynsanperwer kömegine mätäçdiklerini belledi. “Ýagdaýlar örän çylşyrymly, ýöne, biz çözgütleriň tapylmagy üçin hemme işleri edýäris. Biz Kabulda Owganystanyň ýolbaşçylary bilen gatnaşyklary ýola goýduk. Ykdysadyýetdäki ýagdaýlary durnuklaşdyryp biljek iri ykdysady taslamalary amala aşyrmagyň oňat meýilnamalarynyň bardygyny bilýäris” diýip, RF-niň baştutany aýtdy. Bu barada Kremliň saýtynda habar berilýär.
ORIENT news
