Özbegistan Respublikasynyň Prezidenti Türkmenistanyň Prezidentini gutlady
Onuň Alyhezreti,
Türkmenistanyň Prezidenti,
jenap Serdar Berdimuhamedowa
Hormatly Serdar Gurbangulyýewiç!
Siziň Alyhezretiňize özbek we türkmen halklarynyň taryhyndaky möhüm we şanly sene – ýurtlarymyzyň arasynda diplomatik gatnaşyklarynyň ýola goýulmagynyň 30 ýyllygy mynasybetli tüýs ýürekden gutlaglarymy we iň gowy arzuwlarymy beýan edýärin.
Türkmenistan biziň köp asyrlyk ýakyn dostumyz we goňşymyz, wagtyň synagyndan geçen ygtybarly hyzmatdaşymyzdyr. Türkmenistan bilen bizi medeni däplerimiziň umumylygy, dilimiziň we däp-dessurlarymyzyň ýakynlygy baglanyşdyrýar.
Iki ýurduň garaşsyzlyk ýyllarynda geçen ýoluna ser salsak, onda 30 ýylyň içinde bize ýurtlarymyzyň arasyndaky özara bähbitli hyzmatdaşlygyň berk syýasy- diplomatik we hukuk binýadyny döretmek başardandygyny aýratyn bellemek gerek.
Özara hormat goýmaga we goldaw bermäge esaslanýan strategik hyzmatdaşlyk gatnaşyklary biziň umumy syýasy erkimiz netijesinde soňky ýyllarda hil taýdan täze derejä çykaryldy we anyk many-mazmun bilen baýlaşdyryldy. Ýokary derejedäki syýasy dialog, şeýle hem parlamentara we sebitara gatnaşyklary işjeňleşdirilýär.
Söwda-ykdysady, ylmy-tehniki we medeni hyzmatdaşlyk meseleleri, şeýle hem suw hojalygy meseleleri boýunça hökümetara toparlaryň çäklerinde ikitaraplaýyn gatnaşyklaryň ähli ugurlary boýunça bilelikdäki tagallalary durmuşa geçirýäris.
Siziň bilen 2022-nji ýylda Daşkentde, Samarkantda we Aşgabatda bolan dostlukly hem-de netijeli duşuşyklarymyzyň dowamynda biz köptaraplaýyn we uzakmöhletleýin hyzmatdaşlygymyzy yzygiderli ösdürmäge gyzyklanma bildirýändigimizi ýene-de bir gezek tassykladyk.
Şunuň bilen baglylykda, Özbegistan bilen Türkmenistanyň arasyndaky hyzmatdaşlygy halklarymyzyň bähbidine ösdürmek üçin uly mümkinçilikleriň bardygyny bellemek isleýärin hem-de özara haryt dolanyşygynyň möçberlerini artdyrmaga we önümleriň görnüşlerini giňeltmäge, şeýle hem senagat taýdan kooperirleşmegi mundan beýläk-de pugtalandyrmaga taýýardygymyzy tassyklamak isleýärin.
Hormatly Serdar Gurbangulyýewiç!
Ýurtlarymyzyň arasynda ýola goýlan nusgalyk strategik hyzmatdaşlyk gatnaşyklarynyň biziň doganlyk ýurtlarymyzyň abadançylygynyň bähbidine mundan beýläk-de üstünlikli ösdüriljekdigine berk ynanýaryn. Pursatdan peýdalanyp, Size berk jan saglyk, maşgala abadançylygyny we jogapkärli işiňizde uly üstünlikleri, Türkmenistanyň doganlyk halkyna bolsa parahatçylyk, mundan beýläk-de ösüş hem-de abadançylyk arzuw edýärin.
Hormatlamak bilen,
Şawkat Mirziýoýew,
Özbegistan Respublikasynyň Prezidenti
