Türkmenistan we Sloweniýa ýokary derejedäki ikitaraplaýyn saparlary guramagy maslahatlaşdylar
Ýokary derejede ikitaraplaýyn saparlary guramagyň meseleleri Türkmenistanyň Sloweniýa Respublikasyndaky ilçisi Batyr Nyýazlyýewiň (rezidensiýasy Moskwada) Sloweniýanyň DIM-niň wekilleri bilen Lýublýanada geçen duşuşygynyň barşynda ara alnyp maslahatlaşyldy. Bu barada Türkmenistanyň RF-daky ilçihanasynyň saýty habar berýär.
Sloweniýa bolan saparynyň dowamynda ilçi DIM-niň baştutany Tanýa Faýon bilen protokol duşuşygyny geçirdi, şeýle hem Gündogar Ýewropa, Günorta Kawkaz we Merkezi Aziýa bölümleriniň ýolbaşçylary we ministrligiň ykdysady hyzmatdaşlyk departamenti bilen gepleşikler geçirdi.
Türkmen-slowen hyzmatdaşlygyny işjeňleşdirmäge gyzyklanma bildirip, taraplar iki ýurduň daşary syýasat edaralarynyň ýolbaşçylarynyň derejesinde syýasy maslahatlaşmalary geçirmekligiň, şeýle hem şertnama-hukuk binýadyny giňeltmegiň möhümdigini bellediler.
Diplomatlar şeýle hem 2023-nji ýylyň martynda Lýublýanada ykdysady hyzmatdaşlyk boýunça Hökümetara türkmen-slowen komissiýasynyň nobatdaky ýygnagyny we onuň çäklerinde türkmen wekiliýetiniň agzalarynyň Sloweniýanyň ministrlikleriniň we edaralarynyň wekilleri bilen duşuşyklary geçirmeklige taýýarlygyň meselelerine garap geçdiler.
ORIENT habarlar
