Russiýanyň sebitlerinden işewürler wekiliýetleri Türkmenistana yzygiderli gelip durarlar – RF-nyň Söwda-senagat edarasy
Russiýanyň dürli sebitlerinden işewürler wekiliýetleri Türkmenistana yzygiderli gelip durarlar – diýip, RF-nyň Söwda-senagat edarasynyň wise-prezidenti Wladimir Padalkonyň sözlerine salgylanyp, TASS habar berýär.
«Ýakynda Aşgabatda geçen rus-türkmen biznes-forumynyň täsiri astynda bu ugurda goşmaça mesele goýmagy karar etdik: her iki aýdan haýsy hem bolsa bir sebitiň Söwda-senagat edarasynyň wekiliýeti ýurda baryp görmeli we degişli ugurdaky kärdeşleri bilen işleşmeli etdik» – diýip, ol beýan etdi we ilkinji işewürler wekiliýetiniň Lipesk oblastyndan boljakdygyny takyklady.
Şeýlelikde, aprel aýynda Türkmenistan bu sebitden metallurgiýa, gök önümçilik, azyk önümlerini ýerlemek, durmuş tehnikasyny we awtoulag tekerlerini öndürmek ýaly ugurlarda meşgullanýan 40 telekeçini kabul eder.
Padalko geljekki forumyň diňe ara alyp maslahatlaşmalar we işewürlik geňeşleriň mejlisi üçin meýdança bolman, eýsem ikitaraplaýyn duşuşyklary we aragatnaşyklary ýola goýmak üçin hem meýdança boljakdygyna ynam bildirdi.
«Tejribäniň görkezişi ýaly, telekeçiler bizden hut şuňa garaşýarlar, ykdysady gatnaşyklaryň täze halkara ulgamynyň emele gelýän şertlerinde birinji nobatdaky mesele täze bazarlara gönükmek we hyzmatdaşlyk üçin ynamly hyzmatdaşlary tapmak bolup durýar» – diýip, Padalko sözüni jemledi.
ORIENT habarlar
