RF öz ykdysady operatorlaryna TOPH gaz geçirijisiniň gurluşygyna we ulanylyşyna gatnaşmaga ygtyýar berýär
Rus ykdysady operatorlary Owganystanyň içerki ýagdaýlarynyň durnuklaşmagyna baglylykda, Türkmenistan-Owganystan-Pakistan-Hindistan gaz geçirijisiniň gurluşygyna we ulanylyşyna gatnaşyp biler. Bu barada penşenbe güni RF-niň prezidentiniň Owganystan boýunça ýörite wekili Zamir Kabulowyň ozal Kabula bolan saparynyň netijeleri boýunça RF-niň DIM-niň ýaýradan habarynda aýdylýar diýip, TASS habar berýär.
“Owganystandaky ýagdaýlaryň durnuklaşmagyna baglylykda, ýurduň ykdysady operatorlarynyň Türkmenistan-Owganystan-Pakistan-Hindistan gaz geçirijisiniň gurluşygyna we ulanylyşyna, şeýle hem Owganystanyň çäklerinde SSSR döwründe gurlan iri düzümleýin taslamalaryň täzeden dikeldilmegine gatnaşmak mümkinçiligi bolar” diýlip, RF-niň DIM-niň habarynda bellenilýär.
12-13-nji ýanwarda Russiýanyň prezidentiniň Owganystan boýunça ýörite wekili Kabulda saparda bolup, Owganystanyň daşary işler ministri Amir Mottaki hem-de ýurduň ýolbaşçylar ulgamynyň beýleki wekilleri bilen maslahatlaşmalary geçirdi.
Söwda-ykdysady, medeni-bilim we ynsanperwer aragatnaşyklaryň ösdürilmegine ähmiýet bermek bilen, ikitaraplaýyn gatnaşyklara degişli meseleleriň tutuş toplumy boýunça möhüm gün tertibi ara alnyp maslahatlaşyldy.
Kabul bilen, şol sanda Owganystandaky ynsanperwer ýagdaýlary gowulandyrmak maksady bilen, ähli taraplaýyn gatnaşyklary ösdürmegi Moskwanyň yzygiderli maksat edinýändigi tassyklanyldy. Energetika, oba hojalygy, ulag, infrastruktura, senagat, gazylyp alynýan peýdaly magdanlary işlemek ýaly pudaklarda, hususan-da, owgan kompaniýalaryna rus ýangyjyny we oba hojalyk önümlerini täjirçilik taýdan yzygiderli ibermegi guramakda özara bähbitli hyzmatdaşlyk üns merkezinde durýar.
ORIENT news
